Hatutan.com, (31 Marsu 2022), Dili-Hafoin haree tiha rezultadu eleisaun primeira volta nian ne’ebé hatudu kandidatu Prezidente Repúblika, José Manuel Ramos-Horta manan ho votu 303.477 ho (46,6%) no kandidatu Francisco Guterres “Lú Olo” hetan votu 144.282 (22,1%), Sekretáriu Jerál partidu FRETILIN Mari Alkatiri, ladún kontente hodi espresa nia lamentasaun no nia deskonfia buat ruma laloos no dehan, partidu CNRT sosa votu.

Notísia iha Relasaun: Laiha Reklamasaun husi Kandidatu PR sira, CNE Entrega Rezultadu Apuramentu ba TR

Sekretáriu Jerál partidu FRETILIN, Marí Bim Amude Alkatiri. Foto/Hatutan.com.

Hatán  ba jornalista sira bainhira partisipa iha serimónia tomada pose membru Governu foun na’in-rua, Palásiu Prezidensiál, Aitarak-Laran, Dili,  Kinta (31/03/2022),  kona-bá Sekretáriu Jerál FRETILIN bele aprezenta prova CNRT sosa votu ba Tribunál, Mari Alkatiri dehan,  sira-nia parte (FRETILIN-red) sei buka hela, tanba ema sira simu osan ne’e,  tuir Alkatiri, ta’uk mós atu ko’alia sai.

“Ami buka hela, purké ema ida  simu ne’e mós ta’uk, tanba sira hela dook, polísia mós laiha, polísia balu mós la reaje, tanba ne’e mak sira mós ta’uk. Mas, ami iha ona rua ka tolu mak prontu atu denunsia,” Alkatiri hateten.

Advertisement

Alkatiri dehan, bainhira sura hamutuk votu válidu sira entre Lú Olo ho votu rihun 140, no Jenerál Lere Anan Timur ho totál votu rihun 40, no sura totál hamutuk rihun 180.

Notísia iha Relasaun: CNE Fó Oras 24 ba Reklamasaun

Tuir Alkatiri, hosi totál votu ne’ebé iha, nia haree katak, difisil ba ema seluk atu sasa votu hosi militante sira FRETILIN nian. Alende ne’e, tuir dadus, antes ne’e, molok hakat ba kampaña, FRETILIN rejista ona nia militante hamutuk rihun 190.

“Signifika, militante FRETILIN, ema atu sosa mós la hetan. Ne’e, pontu de partida sólidu. Sira (CNRT) nian ne’e, lahatene loos, sé mak fó votu ba sira? Keta kontajen mak la tuir regra karik,” Alkatiri kestiona.

Iha rezultadu ba eleisaun segunda volta nian mai ne’e, Mari Alkatiri fiar metin ona katak, “Lú Olo” mak manán, hodi re-eleitu ba Prezidente Repúblika  períodu 2022 to’o 2027.

Advertisement

“Ha’u la’ós esperansa, ha’u iha serteza katak prezidente Lú Olo, manán,”  Mari Alkatiri afirma tan.

Iha biban ne’e, Mari Alkatiri mós lafiar katak kandidatu PR, José Ramos-Horta, bainhira eleitu ba prezidente repúblika atu dissolve Parlamentu Nasionál (PN).

“Ha’u la fiar nia  (Horta-red) desolve PN. Ha’u mak dehan duni,” tenik Mari Alkatiri hodi fo hatene mos ba jornalista sira katak daudaun ne’e Ramos-Horta tenta ona dehan ba Taur Matan Ruak katak Xanana konkorda Taur atu kontinua Primeiru Ministru to’o 2023.

Alkatiri dehan, nia hatene di’ak, sé mak Ramos-Horta no buat ne’ebé Ramos-Horta koalia iha kampaña polítika atu disolve PN ne’e hanesan ameasa ida atu fó presaun de’it.

“Ha’u koñese di’ak Ramos Horta, kuandu nia ko’alia buat ne’e, ha’u dehan, ne’e nia atu halo ameasa de’it, para bele, haree, sé ema balu iha aliansa ne’e, iha plataforma atu muda ba nova maioria. Ha’u koñese, ami na’in-rua koñese malu di’ak,” tenik Alkatiri.

Advertisement

Jornalista: Rogério Pereira Cárceres