Polítika
Prezidente TLPU, Manuel Pinto rezigna-aan
Hatutan.com, (24 Agostu 2021), Díli—Prezidente organizasaun jornalista, Timor Leste Press Union (TLPU), Manuel Pinto, submete ona karta rezignasaun hosi kargu prezidente TLPU ba Konsellu Ezekutivu TLPU nian.
Notísia Relesaun: TLPU iha dalan sanak, Kongresu estraordináriu ka fahe-malu ba UPJTL
Karta rezignasaun ne’ebé asina diretamente hosi Manuel Pinto, atuál Prezidente Agência Notisioza Tatoli, Institutu Públiku (Tatoli,I.P), ho data 23 Agostu 2021, hato’o diretamente ba ba Vise Prezidente TLPU, Sekretáriu Jerál, Adjuntu Sekretáriu Jerál ho mós tezoureiru TLPU, inklui koñesimentu ba fundadór sira TLPU nian.
Karta rezigsaun hosi Manuel Pinto.
Manuel Pinto iha nia karta rezignasaun ne’ebé Hatutan.com asesu mensiona katak nia rezigna-aan hosi TLPU ho razaun laiha ona tempu natoon hodi reprezenta TLPU tuir artigu 18 (kompeténsia) Estatutu TLPU tanba okupadu ho servisu Estadu nian.
Manuel Pinto eleitu ba prezidente TLPU periodu 2020-2024, liuhosi kongresu nasionál TLPU durante loron rua, sesta-sábadu (20-21/12/2019), ne’ebé hala’o iha Salaun Otel Golgota, Dili.
Liuhosi karta rezignasaun ne’e, Manuel Pinto mós konfirma katak, nia rezignasaun ne’e ho boa-fé, laiha obrigasaun ka persegisaun ruma hosi parte estrutura, inklui membru TLPU nian, maibé rezignasaun ida nu’udar meius ida atu evita konflitu interese nu’udar prezidente TLPU ho servisu Estadu nian ne’ebé maka nia asume hela hanesan prezidente Agência Notisioza Tatoli,I.P.
Sekretáriu Jerál, Horácio Babo, ne’ebé Hatutan.com konfirma via telefónika, konfirma katak karta rezignasaun ne’e mai duni hosi Manuel Pinto. Nune’e, nia parte hasai ona karta informativu ida atu fó dalan ba estabelese komisaun preparativus ba kongresu estraordináriu TLPU nian tuir estatutu haruka.
“Prezidente Manuel Pinto rezigna-aan ona, agora tuir estatutu TLPU nian, katak ita tenke avansa ba kongresu estraordináriu. Ha’u prepara ona karta informativu ida atu forma komisaun organizadora ba kongresu estraordináriu ne’e,” Horácio Babo informa.
Karta informativu
Membru TLPU hamutuk na’in-169 ne’ebé partisipa iha kongresu nasionál tempu ne’ebá ejerse sira-nia direitu liuhosi eleisaun ba estrutura TLPU periodu tinan haat (2020-2024) ho votu 59 ba pakote númeru ida (I) ne’ebé kompostu hosi prezidente Manuel Pinto, primeiru vise prezidente ba asuntu relasaun esterna, Cesar Mali, segundu vise prezidente ba asuntu interna, Raimundo Oki, Sekretáriu Jerál Horacio Babo, terseiru vise prezidente apoiu relasaun institusionál, Jerónimo Amaral, Sekretáriu Jerál, Horácio Babo, primeiru adjuntu Sekretáriu Jerál ba asuntu apoiu Implementasaun Planu no Polítika, Rafael Belo, segundu adjuntu Sekretáriu Jerál ba asuntu apoiu Tékniku Implementasaun Planu no Lojístika, Orlando Pereira, terseiru Adjunta Sekretáriu Jerál III ba Promosaun Igualdade Jéneru, Armandina Moniz no Tezoureiru Venidora Oliveira.
Iha kongresu ne’e, aprezenta pakote kandidatura tolu, maibé pakote rua seluk la konsege rekolla votu maioria kongresista sira nian. Nune’e, segundu pakote (II) ne’ebé Jordão Henrique hanesan kandidatu prezidente hetan votu 44 no terseiru (III) pakote ne’ebé lidera husi João Guterres hetan votu 48.
Iha eleisaun ne’ebé la’o iha ambiente demokrasia partisipativu ne’ebé lidera husi prezidente meza, Domingos Saldanha, identifika mós votu nulu tolu (3).
Iha loron hanesan, estrutura TLPU periodu 2016-2020 ne’ebé kompostu hosi Prezidente Francisco Belo Simões da Costa, Sekretáriu Jerál Manuel Pinto, atribui sertifikadu rekoñesimentu ba inisiadór no fundadór TLPU hanesan, Domingos Saldanha, José António Belo, Lirio da Fonseca Jordão Henrique, Cesar Mali no Nelio Isaac Sarmento (auzente).
TLPU sai mós hanesan membru permanente iha IFJ (International Federation of Journalists) ne’ebé tinan-tinan TLPU iha direitu votu rua iha kongresu IFJ nian ne’ebé nia sekretariadu permanente iha Bruxelas.
Membru TLPU mai husi jornalista ne’ebé loron-loron halo atividade jornalístiku no servisu ba órgaun komunikasaun sosiál (eletrónika no imprime) ne’ebé eziste iha rai laran, inklui jornalista Timor-oan ne’ebé sai hanesan korrespondente ba ajénsia internasionál sira, hanesan REUTERS, EPA, AP, AFP, Kyodo News no seluk-seluk tan. (ico)