Hatutan.com, (28 Agostu 2021), Kabul– Forsa Estadus Unidus Amérika lansa atake ho drone ba grupu Estadu Izlámiku (ISIS) iha Afeganistaun hodi hatudu sira-nia vingansa ba aktu esplozaun bomba suisida (bom bunuh diri) ne’ebé akontese iha Aeroportu Hamid Karzai, Kabul, Afeganistaun, kinta kalan (26/08/2021).
Hatutan hosi Ajénsia Notisioza Reuters, katak Estadus Unidus Amerika lansa atake ho drone ba grupu Estadu Izlámiku (ISIS) iha Afeganistaun leste.
Atake ne’e hodi afirma Prezidente Amérika, Joe Biden nia intensaun kona-ba responde atake ba akontesimentu esplozaun bomba suisida iha Aeroportu Kabul ne’ebé hamata Amérika nia tropa na’in 13.
Iha kinta liubá prezidente Joe Biden husu ba Pentagon atu organiza kontra atake ba ISIS sira.
“Hosi atake drone ne’e, ami domina área Provínsia Nangarhar, Kabul leste no fronteira ho Pakistaun. Indikasaun inísiu hatudu ami konsege oho alvu sira ne’ebé buka tuir. Laiha ema sivíl maka sai vítima,” hatutan komunikadu imprensa forsa Estadus Unidus Amérika nian, sábadu, 28 Agostu 2021.
Iha komunikadu imprensa ne’e, forsa Estadus Unidus Amerika la deskreve saida maka alvu ne’ebé sira atake iha relasaun ho terrór iha Aeroportu Kabul. Maibé, emboot balun iha Governasaun Amérika nian ne’ebé lakohi fó sai nia identidade hateten, atake ne’e nia alvu ba autór sira bomba suisida iha Aeroportu Kabul.
Tuir reportajen Reuters nian, drone Reaper Amérika nian atake kedas ba alvu, mane ida ne’ebé ho hela nia maluk balun nu’udar membru grupu ISIS iha hela nia karreta-laran.
Nu’udar nota ida katak atake iha Aeroportu Kabul la halo direita hosi grupu ISIS maibé hosi ISIS-K (Khorasan). ISIS-K nu’udar grupu afiliasaun ba ISIS ne’ebé halo operasaun espesiál iha Afeganistaun ho Pakistaun. ISIS-K ne’e estabelese iha tinan 2014 no iha indikasaun nu’udar grupu ida inimigu Taliban iha Afeganistaun. (*/bit)
Notísia iha Releasaun : Esplozaun iha Aeroportu Afeganistaun, ema na’in 13 mate no 52 kanek
