Hatutan.com, (31 Agostu 2021), Arábia Saudita– Atake done ka aviaun laho pilotu iha Aeroportu Abha, Arábia Saudita, tersa (31/08/2021), rezulta ema nain ualu kanek no aviaun ida hetan estragu.
Reportajen hosi televizaun estatál Arábia Saudita nian katak atake ne’e ba dala rua ona hosi aviaun laho pilotu (drone) iha tempu oras 24 nia laran ikus ne’e. To’o agora mós seidauk iha parte balun ne’ebé hola responsabilidade ba atake ne’e.
Koligasaun militár ne’ebé lidera hosi Saudita ba kombate rebelde Syiah ne’ebé apoiu hosi Iraun iha Yama, la detalla atake ne’e no Arábia Saudita mós la fó klara kona-ba vítima hosi atake ne’e.
Maske nune’e, koligasaun militár hateten, nia forsa kapta tiha ona drone esplozaun ne’ebé lansa hosi rebelde Houthi. Koligasaun hateten kilat musan sira nakfera no namtate iha besik aeroportu maibé la rezulta sasan ruma at ka estragu.
Atake ne’e mosu hafoin koligasaun tiru monu drone rua ho alvu Jazan no Najran, iha segunda, 30 Agostu 2021.
Iha fulan Fevereiru liubá, rebelde Houthi mós halo atake ba Aeroportu Abha ho drone ne’ebé rezulta ahi han aviaun ida.
Dezde 2015, rebelde Houthi Yama ne’ebé luta kontra militár koligasaun lideradu Arábia Saudita halo tiha ona aeroportu internasionál Abha sai alvu. Rebelde sira mós tau alvu ba instalasaun militár ho infraestrutura importante mina nian iha Arábia Saudita. (fontes oin/*/bit)