Figura
Dom Basílio suspende Padre Martinho hosi Ministériu Saserdotál
Hatutan.com, (31 agostu 2021), Díli—Bispu Dioseze Baucau, Mgr. Basílio do Nascimento, suspende ona Padre Martinho Germano da Silva Gusmão, hosi Ministériu Saserdotál nian, iha Segunda, 30 Agostu 2021.
Dekretu Suspensaun hosi Bispu Dioseze Baucau Dom Basílio do Nascimento ba Padre Martinho Germano da Silva Gusmão, no haruka mós ba Papa Francisco iha Roma.
Iha karta suspensaun ne’ebé Hatutan.com asesu, Dom Basílio fó-hatene ba membru Kreda Katólika hotu-hotu iha Timor-Leste (TL), katak durante tempu naruk ida ne’ebé Padre Martinho da Silva Gusmão kestiona, refleta, rona, reza, no deside kona-bá nia vida no nia knaar Nai Lulik Uma Kreda nian, ho ‘konsiénsia limpa no serrena’, iha loron 25 Janeiru 2020, Padre Martinho Gusmão, haruka karta ida ba nia Bispu Diosezanu hodi husu “RENUNSIA BA MINISTÉRIU SASERDOTÁL’ katak, hapara nia knaar nu’udár Nai Lulik.
Iha loron 04 Fevereiru 2021, Padre Martinho da Silva Gusmão haruka karta ida ba Santu Padre hodi husu ba nia ‘DEMISAUN BA ESTADU KLERIKÁL’ katak, husu atu la moris ona tuir estatutu Nai Lulik nian.
“Nune’e, hatán ba desizaun Padre Martinho Gusmão nian, bainhira prosesu Kanóniku sei la’o hela, ha’u nu’udár Bispu Dioseze Baucau nian, ‘DEKRETA SUSPENSAUN MINISTÉRIU SASERDOTÁL, KATAK HAHÚ 20 AGOSTU 2021 BA OIN, HAPARA AKTIVIDADE SIRA HOTU PADRE MARTINHO GUSMÃO NIAN NE’EBÉ SAKRAMENTU ÓRDEM HARAIK BA NIA ATU HALA’O IHA UMA KREDA,” Karta hosi Kámara Ekleziástika, Dioseze Baucau, ne’ebé Hatutan.com asesu, tersa (31/08/2021).
Kona-bá demisaun estadu Klerikál katak, Padre Martinho da Silva Gusmão la moris ona nu’udár Nai Lulik, ne’ebé simu Sakramentu Órdem, Sé Apostólika, Amo Papa de’it mak sei Demite Padre Martinho Gusmão hosi nia Estadu Klerikál.
Ikus liu Bispu Dom Basilio ne’ebé asina karta suspensaun ne’e hato’o obrigadu ua’in ba membru hotu-hotu Uma Kreda Katólika iha Timor-Leste nia atensaun. Padre Martinho da Silva Gusmão simu Sakramentu Presbiterál iha 08 Setembru 1998.
Bainhira Hatutan.com konfirma ho Martinho Gusmão via WhatsApp, rekoñes katak karta suspensaun ne’e bazeia duni ba nia pedidu hanesan buat ne’ebé hakerek iha ne’ebá. (ger)