Hatutan.com (08 Setembru 2021), Díli—Konsellu Ministru (KM) hakotu Impozisaun Konfinamentu Obrigatóriu Jerál (lockdown) ba populasaun iha Munisípiu Díli-nian, hosi tuku 23:59, loron 09 setembru 2021.
Desizaun hodi hakotu ne’e, liu hosi sorumutuk Konsellu Ministru nian iha Auditóriu Ministériu Finansa (MF), Aitarak Laran-Dili, hafoin halo análize ba aprezentasaun hosi pontu situasaun epidemiolójika país, hosi koordenadór-sira Sala Situasaun Sentru Integradu Jestaun Krize (SIJK) nian, Kuarta (08/09/21).
Reuniaun KM ne’e mós deside mantein Impozisaun Serka Sanitária iha Munisípiu Baucau, Ermera, Díli, no Covalima, to’o loron 22 fulan-setembru 2021.
Hakotu impozisaun serka sanitária iha área sira ne’ebé abranja hosi suku Naimeko, sub rejiaun Pante Makassar, no hosi suku Bobometo, sub rejiaun Oe-silo, suku rua ne’e iha Rejiaun Administrativa Espesiál Oecusse Ambeno (RAEOA), to’o tuku 23:59, loron 08 fulan-setembru 2021.
Impozisaun Serka Sanitária iha Munisípiu Manufahi, ne’ebé vigora to’o loron 15 fulan-setembru tinan 2021, laiha alterasaun.
Nune’e, bandu nafatin tama no sai-hosi munisípiu Baucau, Covalima, Díli, Ermera no Manufahi, exetu tanba razaun-sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.
Proibisaun ida-ne’e la abranje ba indivíduu sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik-sira iha tinan neen mai-kraik ne’ebé akompaña indivídu sira-ne’e.
Antes ne’e, Governu deside Impozisaun Konfinamentu Obrigatóriu Jerál (lockdown) ba populasaun iha Munisípiu Dili-nian liu hosi projetu rezolusaun Governu iha kuarta 25 fulan-Agostu tinan 2021, entre tuku 00:00 loron 27 fulan-Agostu to’o tuku 23:59 loron 02 fulan-Setembru no kontinua hikas iha loron 03 fulan-Setembru entre tuku 00:00 to’o loron 09 fulan-Setembru tuku 23:59.(ger)
