Governu autoriza ona atividade relijiozu

Hatutan.com, (09 Setembru 2021), Díli—Liuhosi reuniaun Konsellu Ministru (KM),  iha loron 09 fulan-Setembru 2021, iha Palásiu Governu, Díli, aprova ona alterasaun dahuluk ba Dekretu Governu númeru 21/2021, loron 27 fulan-Agostu, kona-bá medida-sira ba ezekusaun deklarasaun Estadu emerjénsia, ne’ebé efetua hosi Dekretu Prezidente Repúblika númeru 69/2021, loron 24 fulan-Agostu.

Brosura Hakotu konfinamentu obrigatóriu jerál iha Díli.

“Estadu emerjénsia ne’e, abranje territóriu tomak no vigora  to’o tuku 23:59, loron 29 fulan setembru tinan 2021,” Komunikadu ne’ebé Hatutan.com asesu iha Kinta (09/09/2021).

Ho alterasaun ida-ne’e permite fali realizasaun eventu relijiozu, sosiál, kulturál no desportu-sira, maibé tenke kumpre medida sira prevensaun no kontrolu COVID-19.

Medida prevensaun ne’e mak hanesan,  mantein distánsia sosiál ho fíziku pelumenus metru ida ho ema seluk no sira ne’ebé la hela hamutuk iha uma ida; uza máskara ne’ebé taka inus ho ibun; fase liman beibeik no bainhira hakarak tama iha instalasaun hosi utilizasaun koletiva; no la promove formasaun halibur-malu barak ne’ebé konsidera nu’udár ema halibur-malu mak ema liuhosi na’in-rua halibur-malu menus hosi metru rua entre sira.

Realizasaun funerál tenke adota medida hirak ne’ebé prevene transmisaun virus SARS- CoV-2 nian, maibé oras-ne’e sei permite prezensa iha serimónia fúnebre-sira hosi ema na’in-sanulu ba leten, maibé tenke kumpre protokolu saúde-nian no kumpre medida-sira prevensaun no kontrolu COVID-19.

Organizadór-sira hosi eventu-sira ne’e, tenke informa forsa seguransa-sira kona-bá ninia realizasaun.

Fiskalizasaun hosi kumprimentu regra hosi diploma ida-ne’e nian kompete ba forsa seguransa-sira.

Relijiaun ne’ebé eziste iha Timor-Leste (TL), tuir Survey Demografia no Saúde iha tinan 2016, hatudu katak, Kristaun Katóliku 98.3%, Kristaun Protestante  1.2%, Musulmanu 0.3%, no seluk tan 0.2%. (ger)