Internasionál
Horta hato’o sentidu lutu ba Portugál no família Jorge Sampaio
Hatutan.com, (10 Setembru 2021), Díli—Prezidente Repúblika Timor-Leste (TL) períodu 2007-2012 no Laureadu Nobel ba Pás 1996, José Manuel Ramos-Horta, hato’o profunda sentidu lutu ba nasaun Portugál no família hosi Prezidente Repúblika, Jorge Fernando Branco de Sampaio períodu 1996 to’o 2006, ne’ebé hakotu-iis, Sesta (10/09/2021).
“Ba Dr. Maria José Ritta, oan-sira, família tomak no belun-sira, ami família boot hato’o profunda sentidu lutu,” José Ramos-Horta, hato’o liuhosi ninia pájina ofisiál Facebook ne’ebé sita hosi Hatutan.com.
Iha espresaun Ramos-Horta hateten, ohin, hanesan loron ne’ebé nakonu ho triste ba nia, ba ema barak, feto no mane, tanba Portugál, Timor-Leste, Europa, Comunidade dos Países da Língua Portugesa (CPLP), sente lakon ema kompetente no poderozu, Jorge Sampaio.
Horta konta tuir katak, inísiu hasoru Jorge Sampaio iha tinan 1980, antes eleitu nu’udár Prezidente CML, iha tinan barak nia laran no ikus-mai hanesan Prezidente Portugál.
Horta mós tempu barak liu hamutuk ho matebian, iha Lizboa, Nova Yorke, Oslo no Dili, tanba Jorge Sampaio hanesan ativista boot ida ba direitu umanu no libertasaun, ho razaun ne’ebé justu, inklui hanesan mós ema ida ne’ebé lori independénsia mai povu Timor-Leste.
Notísia ne’ebé sita hosi Casa Ao Minuto, katak, eis Prezidente Repúblika Portugál, Jorge Sampaio hakotu-iis ho idade 81, hafoin estadia saúde iha situasaun kritiku, tanba sofre respiratóriu iha Ospitál Santa Cruz, Lizboa.
Jorge Sampaio hanesan polítiku ne’ebé prudente, pasiénsia no ema dame-na’in, sai mós hanesan advogadu no tinan barak liu interven iha mundu polítika, hahú kedan hosi nia sei iha banku universidade, hanesan mós protagonista ba krize akadémiku iha tinan 1960.
Jorge Fernando Branco de Sampaio, moris iha Lizboa iha tinan 1939, nu’udár Prezidente Repúblika Portugál durante períodu dala rua, entre tinan 1996 no 2006.
Iha tinan 1989, eleitu nu’udár lider másimu ba Partidu Sosialista no iha tempu hanesan eleitu mós hanesan administradór sidade Lizboa.
Bainhira remata mandatu nu’udár Prezidente Repúblika iha tinan 2006, nomeadu hosi Sekretáriu Jerál Organizasaun Nasaun Unida (ONU) hanesan reprezentante espesiál atu luta kontra Tuberkuloze iha 2007 no 2013 hanesan altu Reprezentante ONU ba Aliansa Sivilizasaun. (ger)