Governu Timorense rekoñese meritóriu Jorge Sampaio ba TL

Hatutan.com, (11 Setembru 2021), Díli—VIII Governu Konstitusionál  rekoñese meritóriu hosi eis Prezidente Repúblika Portugál, Jorge Sampaio ba Timor-Leste ninia libertasaun nasionál.

Notísia iha Relasaun : Horta hato’o sentidu lutu ba Portugál no família Jorge Sampaio

“Dr. Jorge Sampaio nia naran sei hakerek iha istória, hanesan Prezidente ne’ebé iha meritóriu boot ba rekuperasaun Independénsia Nasional Timor-Leste nian, ne’ebé marka mós prezensa hodi asiste direta  hanesan bainaka espesiál iha serimónia ne’ebé hala’o iha 20 Maiu 2002 iha Tasi-Tolu, Díli,” Primeiru-Ministru, Taur Matan Ruak, hato’o liuhosi komunikadu imprensa, ne’ebé Hatutan.com asesu, Sábadu (11/09/2021).

Prezidente Repúblika (2012-2016), Taur Matan Ruak, kondekora “Grande Colar da Ordem Timor-Leste” ba Prezidente antigu Portuges Señor Jorge Sampaio, nu’udár sinal rekoñesimentu ne’ebé sinseru ba solidariedade no apoiu ativu iha luta ba Timor-Leste nia independénsia, iha Otél Tivoli, Lisboa, 28 Outubru 2016. Imajen/Média Prezidénsia Repúblika (2012-2016).

Liu hosi komunikadu, Governu Timorense mós konsidera katak, eis Prezidente Repúblika, Jorge Sampaio, sei hela nafatin iha memória  mundu-nian, hanesan lider boot liubá luta libertasaun ne’ebé hetan mós rekoñesimentu nu’udár belun boot hosi povu no nasaun Timor-Leste.

“Lori VIII Governu Konstitusionál no ha’u nia família rasik nia naran, hato’o profunda sentidu kondolénsia  ba belun Saudozu eis Prezidente Repúblika Portugés, Dr. Jorge Fernando Branco de Sampaio, ne’ebé derrepente fila hikas ba ita nia Maromak,” Taur Matan Ruak, espresa.

Durante períodu dala-rua, entre tinan 1996 no 2006, Jorge Sampaio assume kargu hanesan Prezidente Repúblika Portugal, mundu konsiente katak, represaun hosi nasaun jigante Indonézia, no nia sempre uza oportunidade palku internasionál atu fó apoiu ho nia ativízmu forte ba interese luta Timor-Leste nian ba ukun rasik aan.

Povu Timor-Leste hamutuk nafatin ho belun Dr. Maria José Rodrigues Ritta, no família iha orasaun, nune’e iha forsa hodi hakat liu situasaun difisil ida-ne’e.

Iha loron 28 fulan-Outubru 2016, Prezidente Repúblika, Taur Matan Ruak, kondekora “Grande Colar da Ordem Timor-Leste” ba Prezidente antigu Portugés na’in-rua, Señor Mário Soares no Señor Jorge Sampaio, nu’udár sinál rekoñesimentu ne’ebé sinseru ba solidariedade no apoiu ativu iha luta ba Timor-Leste nia independénsia.

Taur Matan Ruak, iha ninia diskursu hato’o rekoñesimentu sinseru husi sentimentu umanu ba espresaun solidariedade no apoiu ativu ne’ebé eis Prezidente nain rua refere halo durante tinan barak nia laran liu hosi  sira-nia esforsu determinadu, hodi lori prosesu, luta ba Timor-Leste nia independénsia ba oin. (ger) 

Notísia iha Relesaun : Mari Alkatiri hato’o profunda kondolénsia ba família Jorge Sampaio no ba povu Portugés tomak