Embaixadór TL ba Indonézia Prioritiza Asuntu Haat Inklui Fronteira Terrestre

Hatutan.com, (08 Outubru 2021), Dili—Embaixadór Timor-Leste (TL) ba Repúblika Indonézia (RI), Filomeno Aleixo da Cruz, sei fó prioridade ba asuntu haat, inklui aselera tratadu fonteira marritima no terrestre, durante hala’o serbisu diplomasia iha nasaun viziñu.

Embaixadór Timor-Leste (TL) ba Repúblika Indonézia (RI), Filomeno Aleixo da Cruz. Foto/Hatutan.com.

Asuntu haat ne’e mak hanesan, hametin kooperasaun iha área adukasaun, saúde, ekonomia no esforsu atu buka-tuir restu-mortál saudozu balun ne’ebé to’o agora seidauk hetan, inklui aselera tratadu fronteira rai-maran no tasi-nian.

Notísia iha Relasaun:Diplomasia Tenke Responde ba Nesesidade TL

Filomeno Aleixo da Cruz rekoñese katak, fronteira terreste ho Indonézia iha risku boot ba pasajen illegál tanba ne’e iha futuru sei esforsu atu prevene movimentu illegál ne’e, liuhosi serbisu hamutuk, entre rai rua ho di’ak, rigór no kumpre lei sira ne’ebé vigora.

Oras-ne’e daudaun, peska illegál mós la’o makás iha tasi Timor, tanba ne’e iha mós hanoin atu aselera tratadu fronteira tasi-nian, nune’e evita peska illegál.

Nia konsidera fronteira TL ho Indonézia laiha separasaun, maibé nafatin iha vínkulu jurídiku ida-idak nian no iha vínkulu ne’e mak halo nasaun rua unidu, hodi halo sinerjia ida atu nafatin serbí povu iha nasaun rua ho dalan legál tuir lei ida-idak nian.

“Kuadru jerál seluk ne’ebé presija kaer mak espíritu rekonsiliasaun entre rai rua, hodi kuidadu relasaun amizade no kooperasaun ne’ebé iha, tuir saida mak hakerek nanis ona iha Comissão Verdade no Amizade (CVA) ho Comissão Acolhamento Verdade e Amizade (CAVR). Ita iha hela prosesu rekonsiliasaun no relasaun, hanesan ema ita presija kuidadu nafatin,” Filomeno Aleixo da Cruz, hateten iha Palásiu Prezidensiál, Bairru-Pité, hafoin simu pose, Sesta (08/10/21).

Kooperasaun iha área edukasaun nian, Embaixadór ne’e mós preokupa ho númeru estudante iha Indonézia ne’ebé barak tebes no kuaze rihun-resin mak namkari iha Provínsia-sira iha Indonézia, hodi hala’o sira-nia estudu.

Tanba ne’e, mekanizmu kontrollu, presija iha atualizasaun dadus, nune’e iha futuru fásil atu bele kontrolla no tau-matan ba-sira nia komportamentu, hodi asegura estudante-sira labele hamosu konflitu no estraga imajen TL iha Indonézia.

Embaixadór foun Timor-Leste na’in-lima ne’ebé foin simu pose hamutuk ho Embaixadór TL ba Repúblika Indonézia Filomeno Aleixo da Cruz, mak hanesan, Embaixadór ba Reinu Tailándia, Juvêncio de Jesus Martins, Reino Béljika Jorge Trindade Neves de Camões, Repúblika Mozambike Francisco Miranda Branco no ba Malázia Joana Veneranda Amaral.

Timor-Leste ho Austrália, asina ona akordu delimitasaun fronteira marítima iha Nova Iorke, iha loron 06 marsu 2018 no Parlamentu Australianu Ratifika ona Tratadu ne’e iha segunda (29/07/2018). (bit)