Cova Lima
Citizen Journalism: Karreta Tula Materiál Konstrusaun UKL Monu
Hatutan.com, (11 Outubru 2021), Covalima— Karreta baskulante ida hos númeru matrikula 50857 monu iha área Aldeia Loro Kida, Suku Fohoem Vila, Postu Administrativu Fohorem, Munisípiu Covalima.
Karret tula materiál projetu UKL monu. Foto/Xefe Suku Fohorem, Fernando Ferreira
Asidente ne’e mosu kauza hosi kondisaun estrada at. Nune’e karreta hosi kompañia Jafred Leo Rai Unip.Lda, monu hodi rezulta materiál ba konstrusaun projetu Uma Kbit Laek (UKL) hetan estragu.
Reportajen hosi kontribuidór Hatutan.com, Chamot Nahac, katak asidente ne’e akontese iha Sábadu (09/10/2021), tuku 12:00 Otl, la rezulta ema ruma kanek no mate, maibé blok 250 ba interese projetu UKL nian rahun barak.
Diretór kompañia Jafred Leo Rai Unip.Lda, Eugilio do Rego Alves Pereira, ne’ebé kondús karreta ne’e hateten, nia mós la espera atu akontese asidente ne’e, maibé nia rekoñese katak asidente ne’e tanba karreta tula kargu ka sasán liu karreta nia forsa no kondisaun estrada mós lad’iak.
“Loloos, ami labele tula blok to’o 250 lori sa’e ba Loro Kida, maibé tanba udan ne’e ita labele sa’e ba ona tan dalan la di’ak, se ita la aselera mak prosesu konstrusaun ne’e pendente ona, no komunidade benefisiáriu mós labele hela lalais iha uma ne’ebé nia merese simu,” Eugilio haktuir bainhira kontribuidór Hatutan.com konfirma direita iha nia hela fatin, Segunda (11/10/2021).
Hosi sorin seluk, Xefe Suku Fohorem, Fernando Ferreira, rekoñese karreta tula materiál konstrusaun UKL ba Loro Kida ne’e monu tanba kondisaun estrada ba Aldeia Loro Kida at no dalan ba Aldeia Loro Kida tenke liuhusi mota-laran.
Karreta ne’ebé monu lori sai tiha ona no agora iha hela armazén karreta kompañia Jafred Leo Rai iha Suai Debos. (**)