Papa Francisco Simpatia Boot atu Vizita TL iha 2022

Hatutan.com, (14 Outubru 2021), Dili—Líder másimu Igreja Katólika iha Roma, Papa Francisco, iha simpatia boot atu hala’o vizita mai Timor-Leste (TL).

Ramos Horta tun hosi aviaun Air Asia iha Aeroportu Internasionál Nicolau Lobato, Komoro, hafoin fila hosi Roma, Kinta (14/10/21). Foto/Hatutan.com.

Papa Francisco hato’o Simpatia  ne’e ba Premiadu Nobel ba Pás no eis Prezidente Repúblika (PR), José Manuel Ramos Horta, bainhira partisipa nu’udár membru jurri ba Prêmiu Fraternidade Umanu iha Vatikanu, 07 Outubru 2021.

“Bainhira Papa Francisco mai ko’alia ho ha’u, ami kaer-liman no nia hateten iha lian Español dehan  ha’u iha simpatia boot ba Timor-Leste. Ha’u hatene katak, Amu Papa hakarak mai nafatin atu vizita Timor,” Ramos Horta, hateten ba jornalista-sira iha Aeroportu Internasionál Nicolau Lobato, Komoro, hafoin fila hosi Roma, Kinta (14/10/21).

Horta hatene di’ak kona-bá ajenda vizita Papa Francisco mai TL, maibé lakohi pronunsia tanba tenke tuir regra protokolár, nune’e formalmente parte Nunsiatura mak sei anunsia, liuliu sei hato’o direta ba Governu no Estadu TL.

“Amu Papa konfirmadu katak, hakarak mai duni iha 2022. Informalmente, ha’u hatene fulan ida ne’ebé Amu Papa atu mai. Maibé, ha’u labele ko’alia ida ne’e no bainhira Nunsiatura ho Governu iha komunikadu konjunta karik, bele informa kona-bá data serteza,” Horta subliña.

Antes ne’e, Horta hala’o vizita ba Vatikanu tanba hetan konvite hodi sai nu’udár juri ba Prémiu Internasionál Fraternidade Umana.

Prémiu internasionál ne’e halo parte ba inisiativa hosi Papa Francisco ho Imam mundu nian ne’ebé boot liu mak, Professór Tayet.

Sekuénsia ne’e, sira deside hodi kria instituisaun ida ba prémiu ne’e atu fó ba ema individuál ka instituisaun ruma ne’ebé promove di’ak ba fraternidade umana no solidariedade umana.

Horta mós hetan konvite hodi hola parte hanesan juri ba prémiu ne’e tinan rua tutuir malu iha 2021 no 2022.

Ohin, iha enkontru ho Ministru Prezidénsia Konsellu Ministru (MPKM), Fidelis Leite Magalhães, Núnsiu Apostóliku Vatikanu nian iha Timor-Leste, Monseñor Marco Sprizzi, hateten  Papa Francisco sei mai vizita TL, bainhira persentajen boot populasaun-nian simu ona vasina kontra hasoru Covid-19.

Jornalista: Rogério Cárceres