Fatin Haloot Dom Basílio Foru ho Símbolu Tolu

Hatutan.com, (03 Novembru 2021), Baucau—Fatin ka rai-kuak ne’ebé prepara hosi Elvino Gonçalves ho nia grupu atu haloot mate-isin Saudozu Dom Basílio do Nascimento nian iha Igreja Katedrál Dioseze Baucau nia-laran prontu ona.

Notísia iha Relasaun : Dom Basílio, Aman no Bibi-Atan Di’ak

Fatin haloot Maktoban Dom Basílio do Nascimento prontu ona. Foto/Hatutan.com

Tuir observasaun Hatutan.com nian iha Igreja laran parte rai-kuak ho nia medida luan sentímetru 82, naruk metru 2,25 no nia altura ka kle’an sentímetru 160 ne’e prepara feitu ona atu haloot mate-isin Dom Basílio nian ne’ebé foru mós hena ne’ebé reprezenta símbolu tolu.

Símbolu dahuluk iha parte ulun ho ain nian foru hena ne’ebé ninia kór  Bandeira Repúblika Demokrátika Timor-Leste, hosi sorin-sorin foru ho hena ho nia kór bandeira Vatikanu no iha parte rai, fatin hatuur kaixaun, nahe ho tais  nu’udar símbolu reprezenta kultura ka lisaun Timor nian.

Símbolu tolu-ne’e ho ida-idak nia sentidu, hanesan bandeira RDTL hatudu katak Estadu Timor-Leste nia rekoñesimentu ba Dom Basílio nia kontribuisaun ba Timor-Leste nia luta independénsia no kontinua kontribui iha ukun rasik an to’o hakotu-iis (eroi), símbolu bandeira Vatikanu reprezenta Dom Basílio mós pertensia ba família-boot Vatikanu no símbolu tais ne’ebé nahe ne’e hatudu katak Dom Basílio Timor-oan ne’ebé mai hosi lisan-ida.   

Dezde Kuarta (03/11/2021), loron tomak to’o  tuku 11:00 kalan, sarani sira hosi parókia Manatuto, Lautem ho Viqueque, inklui sentru estasaun pastorál-sira ne’ebé pertense ba parókia tolu ne’e tama-sai troka malu hodi halo velada no  misa  ba aman no bibi-atan di’ak Dioseze Baucau nian ne’ebé husik hela ona nia bibi-sira ka nia sarani-sira Dioseze tomak Baucau nian iha loron 30 Outubru 2021, tanba sofre moras fuan.   

Dom Basílio ne’ebé koñesidu hanesan figura umorista, hamnasa nain no oin-midar ne’e, lori ninia karater ne’e ba hasoru ona Aman Maromak no husik hela triste no matan-been ba sarani tomak Dioseze Baucau partikularmente no uma-kreda lokál Timor Leste nian.

Maktoban Dom Basílio hatoba iha Altar Santu Igreja Dioseze Baucau. Foto/Hatutan.com

Halerik, hamulak, tanis no matan-been, kontinua suli iha Igreja Santu António Baucau nia laran, bainhira husi sarani sira-ida idak ba fó omenajen ikus ba Saudozu Dom Basílio nia mate-isin ne’ebé hatoba hela iha konjeladór nia laran iha Altar Santu nia oin.   

Maktoban Saudozu Dom Basílio sei haloot iha fatin ne’ebé preparadu ona iha Igreja Katedrál Dioseze Baucau nia-laran iha loron 04 Novembru, tuku 10:00 Otl.

Avizu ne’ebé fó sai ona hosi komisaun organizadora ba prosesu funerál Dom Basílio nian, katak  molok hatún Dom Basílio nia isin-mate ba rai-kuak, sarani sira hotu ne’ebé asiste diretamente iha resintu Igreja Santu António Baucau sei foti-sa’e lensu-mutin ka tissue-mutin hodi halo despedida nian no hateten, “Adeus Dom Basílio, Adeus Dom Basílio no Adeus Dom Basílio”.   

Jornalista : Francisco Belo Simões