Deskonfia Falsifika Dokumentu, Arguidu Na’in-Haat Hosi MOP Submete ba Inkéritu

Hatutan.com, (12 Novembru 2021), Dili—Tribunál Distritál Dili (TDD), Sesta ohin, hala’o inkéritu ka primeiru interrogatóriu ba arguidu na’in-haat ho inisiál S, AB, SS no UPS, ne’ebe deskonfia halo falsifikasaun dokumentu iha Ministériu Obras Públika (MOP).

Arguidu Na’in-Haat ho inisiál S, AB, SS no UPS, ne’ebé deskonfia halo falsifikasaun dokumentu iha Ministériu Obras Públika (MOP), submete ba inkéritu iha Tribunál Distritál Dili (TDD). Foto/Hatutan.com.

Arguidu SS hanesan funsionáriu públiku iha MOP, UPS hanesan konsultór hosi Estranjeiru, no inkéritu ne’e sei hala’o durante loron ida.

Arguidu sira deskonfia komete krime falsifikasaun dokumentu, ne’ebé previstu iha artigu 303 ho pena multa hosi kódigu penál Timor-Leste (TL).

Arguidu na’in haat to’o iha TDD, iha tuku 8:00 dader no primeiru interrogatóriu ne’e hala’o iha tuku 10:00.

Antes ne’e, iha Tersa loron 09 fulan ne’e, Polísia Nasionál Servisu Investigasaun Kriminál (PNSIK),  ezekuta mandadu detensaun buska no apreensaun hosi TDD ho númeru NUC 00/21.PGGCC bá sidadaun na’in-haat iha kapitál Dili no detein arguidu na’in-tolu de’it durante oras 72.

Primeiru interrogatóriu ne’e, prezide hosi juíz singulár Evangelino Belo, MP reprezenta hosi Prokuradór Rogério Viegas no arguido-sira hetan asisténsia legál hosi advogadu privadu Miguel Faria no Octávio.

Jornalista: Carmelita Isaac