Inundasaun iha Aeroportu Comoro, Citilink “Hakdasak” Oras Ida

Hatutan.com, (15 Novembru 2021), Dili—Udan boot kuaze oras ida nia laran, hahú hosi tuku 12:00, iha Segunda ohin, hamosu inundasaun ka bee sa’e, to’o kampu aviasaun laran (apron), hodi difikulta Aviaun Citilink labele semo, no “hakdasak” de’it iha kampu aviasaun Aeroportu Internasionál Prezidente Nicolau Lobato Comoro, durante oras ida nia laran.

Pasajeiru sira tenke tuun fali hosi aviaun Citilink tanba inundasaun iha Aeroportu Comoro, hafoin akontese udan boot durante oras ida, difikulta Aviaun atu semo, Segunda (15/11/21). Foto/Hatutan.com.

Prezidente Konsellu Administrasaun Autoridade Nasionál Aviasaun Timor-Leste (ANATL), José Trindade da Cruz Pinto, informa, situasaun ne’e mosu tanba akontese udan-boot iha oras meiudia ne’e, halo udan been sira tun hosi área Comoro, iha rotunda Nicolau Lobato nian, tama nakonu to’o iha kampu aviasaun laran.

“Aviaun Citilink, ohin atu fila ona maibé tarde, maski pasajeiru sira sa’e hotu derrepente udan boot. Entaun, aviaiun labele traballa kedan, bee sa’e besik nakonu besik mákina. Kuaze oras ida nia laran,” Prezidente Konsellu ANATL, José Trindade da Cruz Pinto, hateten ba jornalista-sira iha knaar fatin Aeroportu Comoro, Segunda (15/11/21).

José Trindade konsidera inundasaun ne’e la’ós foin mak akontese maibé dala-barak ona, bainhira tempu udan boot, bee sempre tama to’o iha Aeroportu laran, liu-liu kampu aviasaun (apron), kauza hosi drainazen la di’ak.

Antes ne’e, bainhira drainazen sei  kondisaun di’ak, la akontese inundasaun, maibé depois iha konstrusaun balun ne’ebé molok ne’e halo, iha ema balun mak taka tiha drainazen (saluran) ida. Nune’e ikus mai, halo bee labele sai, hodi nakonu iha Kampu Aviasaun laran.

“Kuandu bee sa’e maka’as, aviaun sente la seguru, labele traballa, entaun presija karreta ne’e atu dada oitoan ba iha rai maran oitoan, klaran oitoan hodi bele traballa. Tanba ne’e, mak kauza ida ne’e de’it,” Prezidente ANATL ne’e, haktuir tán.

Pasajeiru sira tenke tuun fali hosi aviaun Citilink tanba inundasaun iha Aeroportu Comoro, hafoin akontese udan boot durante oras ida, difikulta Aviaun atu semo, Segunda (15/11/21). Foto/Hatutan.com.

Parte ANATL rekoñese situasaun ida-ne’e katak, nune’e hanesan jestór Aeroportu, parte ANATL  halo hela planu dala-hira ona, maibé tinan hirak ne’e nia laran, kuaze labele realiza, tanba planu atu halo konstrusaun, hadi’a insfraestrutura aeroportu ne’e, tama hotu ona iha planu atu halo estensaun, atu halo terminál, tama hotu iha projetu boot ne’ebé atu mai.

“Tanba ida ne’e, agora ami la halo buat ida, no ami bele hadi’a de’it buat ki’ik oan sira, hadi’a valeta sira ne’e de’it,” José Trindade, hateten.

Maski nune’e, inundasaun iha aeroportu durante oras ida, la estraga sasan ka fasilidade ka mákina ruma.

Aviaun Citilink to’o iha Aeroportu Internasionál Nicolau Lobato, iha segunda (15/11/21), maizumenus tuku 12:00, meiudia.

Observasaun Hatutan.com iha terrenu nota, hafoin udan para, ekipa limpeza sira hosi funsionáriu PAX nian, halo fila-fali limpeza hodi hamoos udan been iha drainazen sira besik iha parte check-in nian.

Jornalista: Rogério Pereira Cárceres