Governu Kansela Atribuisaun Rai Harii Edifísiu PN

Hatutan.com, (17 Novembru 2021), Díli-Governu liuhusi desizaun Konsellu Ministru, kansela atribuisaun rai Estadu ne’ebé lokaliza iha Ministériu Justisa nia oin, Cacioli, Díli, atu harii futuru instalasaun edifísiu Parlamentu Nasionál (PN).

Ministru Justisa, Manuel Cárceres. Foto/Media MJ

Governu deside kansela atribuisaun rai ne’e ba harii edifísiu PN tanba iha instituisaun lubuk ida mak daudaun hala’o hela servisu iha fatin refere. Antes ne’e mós  Primeiru-Ministru, Taur Matan Ruak, simu  pedidu husi PN hodi husu rai ne’ebé lokaliza iha Caicoli, Díli.

“Rai ne’ebé atu atribui ba harii edifísiu PN, ohin, iha debate Konsellu Ministru katak rai ne’ebé iha Caicoli ne’e labele tanba ne’e Governu sei haree fila-fali,” Ministru Justisa, Manuel Cárceres, informa  ba Hatutan.com bainhira partisipa reuniaun Konsellu Ministru iha Palacio do  Governo, Kuarta (17/11/2021).

Iha loron 8 fulan-Novembru 2021, Primeiru-Ministru, Taur Matan Ruak, simu pedidu husi Prezidente PN, Aniceto Guterres, hodi husu rai ne’ebé lokaliza iha MJ nia oin hodi harii futuru instalasaun edifísiu PN no halo despaixu ba MJ hodi haree.

Jornalista : Carmelita Isaac