Hatutan.com, (19 Novembru 2021), Díli-Advogada privadu husi kompañia Oka-D’tel, Adelina Lobo, sei hatama keixa kontra operadór Ceslink, S.A ba Comissão Anti Corrupção (CAC) relasiona ho prosesu administrasaun ba atribuisaun sertifikadu hosi Autoridade Nasional Komunikasaun (ANC) hodi sai operadór telekomunikasaun no movies.
Ministru MTK, José Agostinho entrega sertifikadu ba Ceslink,S.A. Foto/Hatutan.com
Konteúdu husi keixa ne’e tanba Oka-D’tel deskonfia iha indísiu krime. Maske nune’e, Oka’detel entrega ba prosesu investigasaun mak sei haree karik iha mak sei prodús akuzasaun.
“Oka-D’tel la satisfás ho prosedimentu ne’ebé iha tanba ANC haree de’it ba prosedimentu administrativu hodi la konsidera prosesu tékniku no finanseira husi Ceslink S.A sei iha disputa ne’ebé iha hela Tribunál,” Advogada Privada Adelina Lobo responde Hatutan.com via telefónika, Sesta (19/11/2021).
Advertisement
Nia tenik, Segunda (22/11/2021), submete keixa ba CAC tanba Oka-D’tel deskonfia iha indísiu krime, maibé CAC mak bele halo investigasaun kle’an liu no depois de investigasaun karik iha indísiu krime mak sei prodús akuzasaun.
Antes ne’e husi parte Oka-D’tel hatama ona reklamasaun ba ANC hodi tau konsiderasaun ba disputa entre kompañia rua, tanba antes ne’e Ceslink S.A avansa ho Oka-D’tel hodi prienxe prosesu administrativa lubuk ida, ne’ebé hetan mós aprovasaun iha Konsellu Ministru.
Resposta ANC ba reklamasaun ne’e, mak interfere ka la aseita ho Oka-D’tel nia reklamasaun ho razaun laiha ligasaun ho prosesu atribuisaun sertifikadu ba Ceslink, S.A.
Iha sorin seluk, Ministru Transporte no Komunikasaun (MTK), José Agostinho hateten, empreza Ceslink, S.A prienxe rekizitu hotu ne’ebé iha entermu enkuadramentu jurídiku, tanba ne’e bainhira ANC atribui ona sertifikadu ba Ceslink S.A, tanba iha prosesu hatama pedidu to’o iha faze atribuisaun la’ós fasil, signifika prienxe prosesu administrativa, rekizitu tékniku no legais hotu.