Papa Francisco Demite Padre Martinho Gusmão Hosi Estadu Klerikál

Hatutan.com, (20 Novembru 2021), Díli—Papa Francisco liu hosi Kongregasaun Evanjelizasaun ba Povu ho númeru protokolu nú. 3593/21, konsede ba Padre Martinho Germano da Silva Gusmão demisaun ba Estadu Klerikál no Dispensa ba Selibatu. Katak, Padre Martinho husik ona ninia knaar ka dever no obrigasaun tomak nu’udár nailulik (cfr.Can.290 alinea 3).

Komunikadu ne’ebé fó sai hosi Dioseze Baucau, Kámara Ekleziastika Largo Katedrál Timor Orientál.

Komunikadu ne’ebé fó-sai hosi Dioseze Baucau, Kámara Ekleziastika Largo Katedrál Timor Orientál, hakarak komunika ba Padre, relijiozu, relijioza no maluk sarani doben sira iha Timor laran tomak katak, relasiona ho Padre Martinho Germano da Silva Gusmão ne’ebé husu atu demite nia knaar nu’udár Nailulik, tanba ne’e,  maka, iha 25 Janeiru 2020 Padre Martinho hato’o karta ida ba Amu Bispu Dom Basilio do Nascimento (matebian) hodi husu demisaun  ba ministériu Saserdotál.

Notísia iha Relasaun:Dom Basílio suspende Padre Martinho hosi Ministériu Saserdotál

Iha loron 04 Fevereiru 2021, Padre Martinho haruka karta reskritu ba Amu Papa Francisco hodi husu karta demisaun ba Estadu Klerikál.

Iha loron 30 Agostu 2021, Amu Bispu Dom Basilio do Nascimento (matebian) suspende Padre Martinho hosi nia knaar nu’udár Nai lulik.

“Tanba ne’e, responde ba karta reskritu ne’ebé Padre Martinho Gusmão haruka ba Santu Padre Francisco iha 04 Fevereiru 2021, nune’e iha 13 Outubru 2021, Santu Padre Papa Francisco liu hosi Kongregasaun Evanjelizasaun ba Povu ho númeru protokolu nú. 3593/21, konsede ba Padre Martinho Germano da Silva Gusmão demisaun ba Estadu Klerikál no Dispensa ba Selibatu. Katak, Padre Martinho husik ona ninia knaar ka dever no obrigasaun tomak nu’udár nai lulik (cfr.Can.290 alinea 3),” Komunikadu ne’e haktuir.

Ho komunikadu ida ne’e, hosi oin ba oin Senhor Martinho Gusmão sei hala’o nia vida nu’udár ema leigu baibain, no kontinua nafatin fó testemuña fiar hanesan sarani di’ak.

Senhor Martinho Gusmão hala’o nia vida  hanesan leigu baibain iha sosiedade, maibé sakramentu órdem ne’ebé nia simu inkanselável.

Tanba ne’e, sarani hirak ne’ebé iha situasaun perigu de morte, no nailulik laiha liu kedan atu bele atende konfesaun, Senhor Martinho Gusmão bele atende konfesaun no absolve validamente pekadu  sira (cfr. Can. 976 CIC 83).

Agrdaese ba Senhor Martinho Gusmão ne’ebé durante tinan barak nia laran serbí ona Uma Kreda liu hosi nia knaar nu’udár nailulik, no kontinua nafatin reza ba Senhor Martinho Gusmão atu nia bele sai nafatin leigu di’ak no kontinua fó testemuña fiar nu’udár sarani Kristaun iha sosiedade.

Ida ne’ebé asina komunikadu ne’e mak Administradór Diosezanu ba Dioseze Baukau, Padre Alípio Pinto Gumão ho Vise Sanselér Dioseze Baucau, Diákonu Deonisio Guterres Soares.

Hatutan.com konfirma duni ho Senhor Martinho Gusmão via komunikasaun WhatsApp, no Senhor Martinho rasik rekoñese katak, karta ne’e loos duni, maibé seidauk bele fó esklaresimentu ruma tanba sei okupadu ho serbisu importante balun.

Martinho Germano da Silva Gusmão  simu Sakramentu Presbiterál iha 08 Setembru 1998.

Jornalista: Cipriano Colo