Nasionál
MAE Husu Komunidade Tapo Submete Proposta Espansaun Munisípiu
Hatutan.com, (22 Novembru 2021), Dili—Governu liuhosi Ministériu Administrasaun Estatál (MAE), to’o husu ba estudante no komunidade hosi suku Tapo-Memo Postu Administrativu Maliana, Munisípiu Bobonaro, atu submete proposta espansaun munisípiu.
Klibur Estudante no Joventude Suku Tapo Memo-Oan (KLEJOTAMO). Foto/KLEJOTAMO.
“MAE seidauk simu proposta ruma hosi Tapo, ne’ebé hau labele pronúnsia. Maibé regra atu hari’i suku sira, postu, hari’i munisipiu ne’e, iha. Kuandu iha oportunidade sira bele hato’o proposta no ami bele haree,” MAE, Miguel Pereira de Carvalho, hateten ba jornalista sira hafoin hasoru malu ho Xefe Estadu Francisco Guterres Lú-Olo, iha Palásiu Prezidente, Segunda (22/11/21).
Nia husu atu aprezenta proposta ne’e tanba oras ne’e daudaun mós Governu halo hela preparasaun atu halo espasaun ba postu Administrativu Ataúro sai hanesan Munisípiu, ne’ebé tuir planu hahú estabelese iha 01 Janeiru 2022, atu bele funsiona tuir dekretu lei númeru 03/2016.
Foin lalais ne’e mós, Klibur Estudante no Joventude Suku Tapo Memo-Oan (KLEJOTAMO), Postu Admnistrativu Maliana, Munisipiu Bobonaro, liu hosi konferénsia imprensa husu ba Governu atu halo espansaun ba Suku Tapo bele sai hanesan munisípiu foun ida.
Estudante hirak ne’e husu tanba Munisípiu Bobonaro ho totál populasaun 92.049 tuir dadus Sensus 2010 no totál populasaun 97.762 tuir Sensus 2015 nian, mai hosi Postu Administrativu neen (6) no totál Suku hamutuk 50.
Jornalista: Rogério Pereira Cárceres