Membru UPF 21 Promovidu ba Ajente Prinsipál

Hatutan.com, (22 Novembru 2021), Dili—Komandu Polísia Nasionál Timor-Leste (PNTL), liuhosi Unidade Patrullamentu Fronteira (UPF), iha segunda, 22 Novembru 2021, tuku 08:00 realiza serimónia promosaun deviza ba membru UPF na’in 21, hosi Postu Ajente ba Ajente Prinsipál.

Komandante UPF, Superintendente Polísia, Euclides Belo pose hamutuk ho membru promovidu sira ba Ajente Prinsipál, iha Segunda (22/11/2021). Foto/PNTL.

Komandante UPF, Superintendente Polísia, Euclides Belo hateten,  promosaun ne’e komandu oferese, tanba hatudu ona disiplina no loialidade iha kna’ar UPF tuir lei orgánika PNTL nian, no mós tanba modalidade antiguidade tuir lei promosaun nian.

Notísia iha Relasaun:Koñese Deviza PNTL no Formasaun atu Lidera Eskuadra to’o Komisáriu

Maski nune’e, Euclides Belo konsidera promosaun deviza ne’e, la’ós prémiu, maibé nu’udár responsábilidade ida ba membru sira hodi presta nafatin kna’ar ho di’ak, obedese ba órden Komandu, atu bele servi povu no nasaun.

“Esperansa Komandu maka depozita konfiansa ba promovidu sira atu hasa’e responsabilidade tuir patentes deviza ne’ebé sira simu. Signifika, promosaun la’ós prémiu, maibé responsábilidade ba sidadaun sira nia seguradidade iha fronteira,” Superintendente Polísia Euclides Belo, hateten liuhosi komunikadu ne’ebé Hatutan.com, asesu ohin.

Despaixu ba kompeténsia promosaun ba Ajente UPF na’in haat iha postu sira iha RAEOA.

Membru UPF na’in 21 ne’ebé komandu PNTL halo ona promosaun deviza ba Ajente Prinsipál mak hanesan, Honorio Duarte (Postu Quartél Batugade), Julião Soares (Postu Nunura), Valdamiro Agus Quintão (Quartel UPF), Agostinho S. Araújo (Postu Nunura), Vicente das Neves (Quartél Batugade), Octaviano Tavares, (Quartél Batugade), Domingos Barreto, (Postu Badut Mean), Bendito Soares (Postu Mota-ain), Carminda de Jesus, (Postu Aeroporto Dili), Cristiano Falo (Posto Tunubibi), Dircia da Conceição (Postu Tunubibi) no Sei iha tán na’in neen hosi Suai no na’in haat hosi Rejiaun Administrativa Espesiál Oecusse Ambeno (RAEOA).

Notísia iha Relasaun:Deskobre fukun-sira fó espasu ba pasajen ilegál buras iha fronteira

Jornalista: Rogério Perreira Cárceres