Hatutan.com (25 Novembru 2021), Díli—Tribunál Distritál D’ili (TDD), liu hosi leitura akordaun ne’ebé lee hosi juiz preside, kondena arguidu Lucas Soares ho pena multa $100 no alternativa prizaun loron 60 bainhira la selu multa, tanba komete krime denunsia kalunioza hasoru eis Prezidente Comissão Nasionál das Eleições (CNE), lezadu Alcino de Araújo Barrís.
Eis Prezidente Comissão Nasionál das Eleições (CNE), Alcino de Araújo Barrís. Foto/Dok Alcino Barrís.
Akuzasaun antes hosi Ministériu Públiku (MP) katak, arguidu Lucas Soares hanesan funsionáriu públiku no lezadu Alcino de Araújo Barrís iha momentu ne’ebá hanesan Prezidente CNE.
Advertisement
Iha fulan Marsu tinan 2020, tuku 10:00 lezadu loke média sosiál facebook haree hetan arguidu tau komentáriu iha nia pájina facebook katak, lezadu nu’udár Prezidente CNE halo komentáriu iha kanál TVTL la iha imparsialidade, tanba fó influénsia ba Prezidente Repúblika (PR) atu konvense partidu CNRT hodi forma koligasaun.
Alende ne’e, arguidu dún lezadu mak indika kompañia hodi sosa billete aviaun viajen no halo manutensaun ba karreta ne’ebé la liu hosi prosedimentu legál, maibé iha indikasaun familiarizmu.
Ho hahalok arguidu, MP akuza arguidu ba prátika krime denunsia Kalunioza ne’ebé previstu iha artigu 285 hosi Kódigu Penál TL.
Audiénsia julgamentu ne’e prezide hosi juiz singulár Ivan Suritai, MP reprezenta hosi Prokuradora Bemvinda do Rosário no arguidu hetan asisténsia legál hosi Defensór Públiku João de Carvalho.