Saúde
Oferese Ró Ambulánsia, Governu TL Agradese Povu Indonézia
Hatutan.com (25 Novembru 2021), Díli—Governu Timor-Leste (TL) liu hosi Ministériu Saúde (MS) agradese ba Povu iha nasaun Repúblika Indonézia, ne’ebé oferese ona Ró Ambulánsia ida hodi fasilita transferénsia hosi Ataúro no Rejiaun Administrativa Espesiál Oecusse Ambeno (RAEOA), mai Hospitál Nasionál Guido Valadares (HNGV), Díli.
Ró Ambulánsia ne’ebé oferese hosi Povu Indonézia, iha Portu Díli, Kinta (25/11/21). Foto/Media MS.
“Apresia nomós hato’o agradese ba povu Indonézia ne’ebé fó apoiu Ró Ambulánsia ne’e ba Governu TL. Obrigadu mós ba solidariedade hosi povu Indonézia ba povu Timorense ne’ebé ajuda ona durante pandemia Covid-19,” Ministra Saúde, Odete Maria Freitas Belo hateten bainhira partisípa iha serimónia handover Ró Ambulánsia ida hosi Reprezentante Embaixadór Indonézia iha Timor-Leste, Alamsyah, iha Portu Díli, Kinta (25/11/21).
Iha fatin hanesan, Diretór Jerál Serbisu Nasionál Ambulánsia Emerjénsia (SNAE), Horácio Sarmento konsidera Ró ne’ebé Indonézai oferese mai TL ne’e sei ajuda tebes Governu liu-liu SNAE hodi tulun di’ak liu tán transferénsia pasiente ho kondisaun no kategoria emerjénsia.
Parte MS sei halo nafatin koordenasaun ho parte relevante sira atu bele apoia nafatin iha parte tékniku hodi asegura ró ne’e no MS mós kompromete katak, sei kuidadu duni Ró ambulánsia ida-ne’e ho di’ak.
Iha okaziaun ne’e Horácio Sarmento hato’o kedan ba Governu no Parlamentu Nasionál atu haree didi’ak alokasaun Orsamentu ba MS, iha debate Orsamentu Jerál Estadu (OJE) 2022 hodi bele halo mós manutensaun ba ró ambulánsia ne’e rasik iha futuru.
Reprezentante Embaixada Indonézia iha Timor-Leste, Alamshya hateten, KBRI kompromete atu hametin nafatin relasaun bilaterál ida-ne’e no sei prontu nafatin atu apoia saída de’it iha área saúde.
Alamshya hameno hela ba Governu TL atu bele utiliza didi’ak Ró Ambulánsia ne’e hodi halo operasaun iha tempu naruk.
Kustu ba Ró-ambulánsia ne’e rasik hamutuk $200.000, ho kapasidade tula ema na’in 25 inklui navegadór no velosidade hosi Portu Dili ba Ataúro minutu 15.
Jornalista: Rogério Cárceres