Novembru, Tránzitu Salele-Batugade Rekolla Rihun $8-resin

Hatutan.com, (29 Novembru 2021), Dili—Durante fulan Novembru, Komandu Polísia Nasionál Timor-Leste (PNTL), liuhosi Departamentu Tránzitu Nasionál no Seguransa Rodoviária, rekolla taxa hamutuk rihun $8.832 iha fronteira Salele (Mota-masin) no Batugade (Mota-ain).

Xefe Departementu Tránzitu Nasionál, Superintendente Polísia, João Belo dos Reis. Foto/PNTL.

Xefe Departementu Tránzitu Nasionál, Superintendente Polísia, João Belo dos Reis, hateten taxa ne’ebé parte tánzitu rekolla ne’e, liuhosi sirkulasaun estranjeira ne’ebé tama hosi fronteira rua ne’e.

Notísia iha Relasaun:Koñese Deviza PNTL no Formasaun atu Lidera Eskuadra to’o Komisáriu

“Tránzitu nasionál destaka postu fronteira rua iha Mota-masin iha Salele, nomós Mota-ain iha Batugade. Hosi postu rua ne’e, iha fulan Novembru nia laran, ita hatama osan ba kofre Estadu,” Superintendente Polísia, João Belo dos Reis, hateten ba jornalista-sira iha kna’ar fatin, komandu jerál Caicoli, Segunda (29/11/21).

Kona-bá dadus asidente, ne’ebé sira rejista iha semana kotuk nian, hamutuk 36, kompostu hosi kanek hamutuk 30, kazu 4 mak ho kanek todan, no vitima na’in-rua lakon vida.

Prosesu investigasaun ba kazu sira ne’e, iha balun mak nia prosesu remata ona, no kazu balun aprezenta ona ba tribunál.

“Kona-bá asidente, iha 23 ho 24 Novembru, ita hatama osan hamutuk $2.617,” João Belo, hateten.

Durante halo atividade pasa revista, membru PNTL deteta katak, infratór barak mak laiha karta kondusaun.

Nune’e, Komandante João Belo konsidera aktu ida-ne’e signifika sidadaun sira seidauk komprende didi’ak regra sira kona-bá movimentu tránzitu nian, liu-liu oinsá mak para, oinsá mak halo manobra, no oinsá mak lori motór ho di’ak.

Tanba ne’e maka, polisia tránzitu, dala ida tán la autoriza maluk sira ne’ebé karta laiha atu kondúz transporte iha Estrada públiku.

Tuir relatóriu hosi Departamentu Tránzitu Nasionál no seguransa rodoviária, totál motorizada sira ne’ebé PNTL prende hosi munisipiu hotu, durante iha fulan novembru hamutuk 46.

Dadus jerál iha estatístika komandu PNTL nian, hatudu katak, asidente ne’ebé mosu iha territóriu nasionál iha fulan Novembru laran, tipu transporte ne’ebé involve asidente barak liu, maka nafatin okupa hosi motorizada ho marka beat, kuaze 60%.

Jornalista: Rogério Pereira Cárceres