Justisa & Krime
Kazu Eis Ministru Arcangelo Leite, Tribunál Rona Eis Diretór Finansas
Hatutan.com, (01 Dezembru 2021) Díli– Tribunál Distritál Dili (TDD), Kuarta (01/12/2021), kontinua halo julgamentu ba krime partisipasaun ekonomia no negósiu ne’ebé deskonfia involve hosi eis Ministru Administrasaun Estatál no Ordenamentu Territóriu iha tinan 2010, Arcangelo de Jesus Gouveia Leite ho funsionáriu públiku na’in-haat no emprezáriu na’in-rua tan.
Funsionáriu Públiku na’in-haat ne’e, kompostu hosi arguida Rosa Amaral Vong, arguidu Angelo Urbano Fernandes, Agostinho Ximenes, Domingos Monteiro, no Diretora Empreza Nautetu Unipesoal Lda, arguida Maria de Fatima Imaculada Correia Costa Belo ho Direktor empreza Liafau Indah Unipesoal Lda, arguido Fernando Mak.
Iha julgamentu kontinuasaun ne’e, arguidu Angelo Urbano Fernandes ne’ebé iha tempu ne’ebá hanesan Diretór Jerál Finansas iha Ministériu Administrasaun STATAL, deklara ba Tribunál katak, nia parte simu dokumentu husi funsionáriu ida ho naran António Coracão de Jesus hodi asina maibé kona-bá pedidu adisionál nia parte la iha koñesimentu. Tanba projetu ne’e Ministériu Estatál maka sai na’in no Ministériu Obras Públiku (MOP) maka prepara BoQ no halo verifikasaun.
“Iha momentu ne’ebá dokumentu sira ne’e ha’u hanoin pagamentu normal entaun ha’u asina, tanba ne’e kona ba pedidu adisionál ha’u la iha koñesimentu,’’ arguidu Angelo Urbano Fernandes hateten iha sala audiénsia.
Hafoin rona arguido, Tribunál adia hikas julgamentu ba loron seluk hodi kontinua rona arguidu sira seluk.
Ministériu Públiku akuza arguidu Arcangelo de Jesus Gouveia Leite, arguida ho arguidu sira seluk ho krime rua; partisipasaun ekonomia no negósiu no arguida Maria de Fatima Imaculada Belo no arguidu Fernando Mak ba krime Burla Agravadu, no arguidu Agostinho Ximenes, Domingos Monteiro ba krime Administrasaun Danoza ne’ebé previstu iha artigu 299, 267, 274 husi kódigu penal Timor Leste, relasiona ho konstrusaun edifísiu foun Kamara Munisípiu Baucau no Oé-Cuse ne’ebé fó prejuizu ba Estadu ho montante Global ba projetu rua hamutuk $147,024.44.
Audiénsia julgamentu preside husi juiz koletiva António Carmona, Ercilia de Jesus, Albertina Neves no MP reprezenta husi Prokuradora Lidia Soares no arguidu sira hetan asisténsia legal husi Defensor Públiku Fernando no Advogadu Privadu sira.
Jornalista: Carmelita Isaac