CAC Kontinua Sensibiliza Lei MPCC iha Aileu

Hatutan.com, (02 Dezembru 2021), Dili—Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis Sampaio, kontinua hala’o sensibiliza ba Lei Nu. 7/2020 Medidas Prevensaun no Kombate Korrupsaun (MPCC), ba servidór povu ne’ebé haknar an iha Munisípiu Aileu.

Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis Sampaio, hala’o sensibilizasaun Lei MPCC ba servidór Povu iha, Salaun Administrasaun Munisípiu Aileu, Kinta (02/12/21). Foto/Média CAC.

Komisaun intensivu programa sensibilizasaun ba servidór povu iha territóriu Timor-Leste (TL) laran tomak atu komemora loron mundiál Anti-Korrupsaun ne’ebé sei selebra iha loron 09 Dezembru.

Notísia iha Relasaun:Lei MPCC Nu’udár Afirmasaun ba Interese Superiór Povu Nian

Sorumutu sensibilizasaun ne’e Komisaun organiza ho topiku “Hasa’e Koñesimentu Ajente Públiku Kona-bá Lei MPCC”, atu hakle’an koñesimentu servidór Estadu sira iha liñs ministeriál no iha munisípiu sira atu bele hamenus risku monu ba iha tentasaun krimi korrupsaun iha servisu fatin.

Komisáriu Adjuntu Luis Sampaio agradese ba servidór povu iha Munisipiu Aileu no hato’o apresiasaun kle’an hodi depozita tempu atu hola parte iha divulgasaun Lei MPCC iha Salaun Sorumutu Administrasaun Munisípiu Aileu, iha Aisirimou.

“Lei ne’e rasik lejisladór konklui kuaze dekade ida nia laran tinan kotuk iha fatin istóriku ida-ne’e duni, Aisirimou tinan kotuk. Formulasaun Lei ida ne’e envolve mós hanoin sira hosi Sosiedade Sivil (JSMP) no kamada sosiál sira hotu,” Hatutan.com sita deklarasaun Komisáriu António Sampaio, iha kaomunikadu  Kinta (02/12/21).

Munisípiu Aileu no iha fatin istóriku ba luta libertasaun nasionál Timoroan sira nian, Aisirimou lejisladór sira formula no aprova unanimidade Lei Nu. 7/2020.

Komisáriu Adjuntu Luis Sampaio ninia esperansa katak, Aileu oan sira bele sai nu’udár promotór iha luta foun Timoroan sira nian, prevene no kombate korrupsaun iha rai doben Timor-Leste.

Lei ida ne’e tuir pensamentu lejisladór sira nian katak, hatu’ur pensamentu superioridade, no korrupsaun hanesan virus ida, ne’e duni, presiza partisipasaun hosi entidade hotu-hotu hodi kombate korrupsaun.

Atividade ida-ne’e hanesan kampaña sensibilizasaun hodi komemora loron mundiál anti-korrupsaun nian ne’ebé sei monu iha loron 09 fulan Dezembru.

Antes ne’e, CAC hala’o ona sensibilizasaun ba instituisaun públiku sira hotu iha nasionál, no mós munisipál territóriu tomak.

Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis Sampaio, hala’o sensibilizasaun Lei MPCC ba servidór Povu iha, Salaun Administrasaun Munisípiu Aileu, Kinta (02/12/21). Foto/Média CAC.

Iha 14 maiu 2021, CAC hasai notifikasaun iha nível Ministériu, Sekretária Estadu to’o autoridade munisipál hamtuk 66, hato’o mós notifikasaun ba instituisaun autónoma 25 ba prosesu arrolamentu ne’e, hodi deklara riku soin.

Prosesu arrolamentu dadus pesoál ne’ebé instituisaun ida-idak sei aprezenta relatóriu informasaun, nune’e CAC hahú efetua serbisu ba instituisaun hira mak arroladu, hodi sujeita ba deklarasaun.

Tanba ne’e, sei halo arrolamentu ba dadus pesoál hosi instituisaun hotu-hotu, hafoin define mapeamentu instituisaun hira mak aplika uluk hodi deklara riku-soin.

Lei numeru 7/2020, 26 agostu kona-bá Medida Prevensaun no Kombate Korrupsaun (MPCC), tama ona iha vigór, iha 22 fevereiru 2021.

Lei MPCC prevee iha kapitulu II Regime de Declaraçao de Rendimentos, Bens e Interesses hosi artigu 27 to’o artigu 58.

Jornalista: Rogério Cárceres