AF-TL Realiza Eventu FreeStyle Nasionál

Hatutan.com, (03 Dezembru 2021), Dili—Asosiasaun Freestyle Timor Leste (AF-TL) realiza eventu nasionál hodi komemora loron proklamasaun independénsia ba dala 46.

Diretór Desportu Eskolár no Komunitária, João Rodriguês. Foto/Hatutan.com.

Eventu ne’e rasik hetan apoiu hosi Sekretáriu Estadu Juventude Desportu (SEJD) ho orsamentu hamutuk $5.400, ne’ebé organiza hosi asosiasaun Freestyle TL servisu hamutuk ho Federasaun Motor Cross TL.

“Ita apoia ho kbiit ne’ebé iha, atu asosiasaun sira bele organiza eventu sira ne’ebé bele akumula rider sira no nafatin promove talentu ne’ebé foin sa’e sira iha,” Diretór Desportu Eskolár no Komunitária, João Rodriguês hateten ba jornalista-sira iha Kampung Alor, Dili, Sesta (03/12/21).

Governu iha komitmentu atu iha futuru apoiu nafatin  asosiasaun hotu hodi realiza eventu nasionál sira hanesan ne’e, hodi diverte komunidade iha selebrasaun loron nasionál sira atu fo ondra ba mártir sira hotu.

“Governu apoia no asosiasaun sira ne’ebé simu fundus hosi SEJD mak tenke hatudu sira nia vontade no komitmentu atu kontribui ba dezenvolvinentu nasionál,” Diretór ne’e, hateten.

Eventu freestyle iha Kampung Alor, Dili, Sesta (03/12/21). Foto/Hatutan.com

Iha fatin hanesan Vise Prezidente Komisaun Organizadora ba eventu terseira kompetisaun Freestyle motor, Francisco Romeo Rodriguês hateten, eventu freestyle ne’e realiza atu komemora loron proklamasaun independénsia  ho objetivu prinsipál seluk maka promove talentu foin sae sira nian iha área desportu freestyle.

Aktividade ida ne’e realiza tanba hetan mós tulun hosi patrosinadór sira hanesan Fraternity LDA, Dellos, Novalo Unipesoal, Lda, Phiefil-Pietama Furak, Lda, Timor Telecom, United Bike, Ichae no federasaun ciclismo TL.

Aktividade ne’e sei realiza durante loron ida ba klase tolu hanesan klase sport ho totál motór 10 kompostu hosi motór vixon, kawasaki no klx.

Klase metik, totál motór 8 no ikus liu iha klase kolaborasaun sei kolabora hosi ekipa hamutuk 6. Manan na’in sira sei hetan prémiu hanesan osan, sertifikadu no medalla.

Jornalista: Vito Salvadór