Hatutan.com (07 Dezembru 2021), Dili—Prezidente Repúblika (PR), Francisco Guterres Lú Olo, apela ba kompatriota hotu-hotu atu aproveita Loron Memória, reflete dalan naruk terus nian ne’ebé hala’o tiha ona, hodi inspira no fó forsa atu kontinua obra ne’ebé inísia ona.
“Ha’u apela ba kompatriota hotu-hotu atu aproveita loron Memória, ho dalan, individualmente ka iha koletivu, reflete dalan naruk terus nian ne’ebé ita liu tiha ona. Nia bele inspira ita no fó forsa atu kontinua obra ne’ebé inísia tiha ona,” Prezidente Repúblika hateten iha mensajen ba Povu tomak atu komemora Loron Memória, iha Palásiu Prezidensiál Nicolau Lobato, Díli, Tersa (07/12/21).
Loron 07 Dezembru marka inísiu hosi Povu nia luta naruk nakonu ho aten-brani ba ninia independénsia no liberdade ne’ebé manán hafoin tinan-24 nia laran.
“Ita hotu preokupadu atu harii futuru. Atu halo ne’e nesesáriu tebes valoriza pasadu. Ita-nia dever atu hatene sakrifísiu ne’ebé hatudu husi kompatriotas mate iha funu laran, no nu’udar forma ida agradese, forma ida rekoñese saida mak sira halo tiha ona ba rai ne’e. Lahó ho sira-nia mártiriu no sakrifísiu ita la hetan pátria ida livre no independente,” Xefe Estadu subliña.
Prezidente Repúblika husu ba família, Eskola, Partidus Polítikus, Organizasoins Sosiedade Sivíl no Sidadaun hotu-hotu halo esforsu atu koñese istória, valoriza pasadu, foti lisaun sira atu bele garante jerasaun tuirmai hodi hetan futuru ida di’akliu no pás.
Tanba ne’e, importante tebes ba Timoroan hotu atu hanoin hikas faktus iha pasadu no reflete kona-bá saida mak halo ohin no aban, atu kontinua obra husi mártir sira.
Prezidente Repúblika hateten katak relijiaun Kristaun kontribui fortemente ba identidade. Liafuan kalváriu sai familiár ho ninia signifikadu terus.
Iha 07 Dezembru 1975, militár Indonézia lansa invazaun ho eskala boot ba Timor Leste. Marka mós inísiu Povu nia mártiriu naruk, kalváriu nasionál.
Prezidente Repúblika hateten katak kompatriotas barak mate iha loron trájiku ne’e, inklui kompatriotas ho orijen xinés, Borja da Costa, Rosa Muki Bonaparte no jornalista Australianu, Roger East.
Konstituisaun Repúblika Demokrátika Timor-Leste rekoñese no valoriza rezisténsia sekular Povu Maubere kontra dominasaun estranjeira no sira hotu nia kontribuisaun ba luta independénsia nasionál.
Parlamentu Nasionál, liuhusi Lei númeru 3/2016, 25 maiu, eleva loron 07 Dezembru nu’udár Loron Memória.
Jornalista: Rogério Cárceres
