Deskunfia Foti-Subar Riku-Soin, TDD Aplika Aprezentasaun Periódika ba Arguidu Na’in-Haat

Hatutan.com, (10 Dezembru 2021), Díli– Tribunál Distritál Díli (TDD) aplika medida koasaun aprezentasaun periódika ba arguidu na’in-haat ho inisiál GADS, RJC, AVR ho OCX ne’ebé deskonfia komete krime furtu agravadu no brankamentu kapitál.

Notísia iha Relasaun: Deskonfia, Arguidu Na’in-Ualu Foti-Subar Riku-Soin Matebian Cirilo Cristóvão

Arguidu sira ho nia família marka prezensa iha TDD, Sesta (10/12/2021). Foto/Hatutan.com

Arguidu na’in-haat seluk tan  ho inisiál MDFA, DAJL, TSX ho OVR mós TDD aplika Termu Identidade Rezidénsia (TIR) ba kazu  hanesan  ne’ebé iha relasaun ho deskonfia foti-subar riku-soin matebian Cirilo Cristóvão, eis Ministru Defeza.

Arguidu na’in-ualu ne’e deskonfia foti-subar matebian Cirilo Cristóvão nia riku-soin ho estimasaun osan millaun rua Dollar Amerikanu ($2.000.000).

Liuhusi desizaun ba primeira interrogatóriu, Sesta loraik (10/12/2021), Tribunál aplika medida koasaun ne’e ba arguidu sira tanba laiha indísiu ba krime ne’ebé Ministériu Públiku promove hanesan furtu agravadu no brankamentu kapitál.

Advogadu privadu Olívio Barros ne’ebé fó asisténsia legal ba arguidu sira aseita ho medida koasaun ne’e tanba adekuadu ba nia kliente hodi asegura arguidu sira-nia prezensa durante investigasaun.

“Husi krime rua ne’ebé MP promove ba arguidu sira, Tribunál hare husi ezame produsaun ba prova katak laiha meiu indikasaun ba krime brankamentu kapitais, tanba natureza no montante la apura nia valor. Kona-bá krime furtu agravadu, Tribunál mos. duvida ho ninia indikasaun tanba bazeia ba deklarasaun arguida nian katak la hatene montante osan ne’ebé sira foti, Maibé matebian maka autoriza sira foti osan ne’e,” Olívio Barros informa ba Hatutan.com hafoin desizaun  iha TDD.

Iha alegasaun Ministériu Públiku husu ba Tribunál atu aplika medida koasaun prizaun preventiva ba arguidu OVR, RJC no aprezentasaun periódika ba arguidu na’in-neen seluk, maibé ikus mai Tribunál deside medida koasaun aprezentasaun periódika no TIR maka adekuadu liu ba arguidu sira relasiona ho arguidu sira-nia deklarasaun durante primeiru interrogatóriu.

Iha primeiru interrogatóriu ne’e, Ministériu Públiku promove arguidu sira ba krime furtu agravadu no brankamentu kapitál ne’ebé previstu iha artigu 252 no 313 husi kódigu penál Timor-Leste.

Hafoin de Tribunál aplika medida koasaun ne’e, arguidu sira kontente hamutuk ho família hodi fila ba uma.

Primeiru interrogatóriu ne’e prezide husi juiz singular Ivan Suritay, Ministériu Públiku reprezenta husi Prokuradór Matias Soares no arguidu sira hetan asisténsia legal husi advogadu privadu na’in-tolu.

Jornalista: Carmelita Isaac