OMS: Omicron Da’et Lais Liu Delta

Hatutan.com, (13 Dezembru 2021), Díli—Dadus inísiu hosi Organizasaun Mundiál Saúde (OMS), hatudu katak, Covid-19 ho nia variante Omicron da’et lais liu kompara ho variante Delta, no bele hafraku vasina sira ne’ebé oras-ne’e iha.

Foto Ilustrasaun REUTERS.

OMS deskobre katak, Omicron iha posibilidade boot atu da’et makás liu variante Delta, no oras-ne’e daudaun Omicron da’et ona to’o nasaun hamutuk  63 iha mundu.

Nível infesaun, variante Omicron mak da’et lalais liu iha Áfrika Súl, iha ne’ebé antes ne’e variante Delta mak domina kontinente ne’e.

Alende ne’e, OMS mós rejista katak, Covid-19 variante Omicron mós da’et lais liu iha England, ne’ebé mós sei dominadu hosi variante Delta.

“Buat ne’ebé OMS haree hetan maka variante ne’e fásil liu atu hafraku imunidade ema nian ho vasina sira ne’ebé iha ona no da’et lalais liu,” deklarasaun hosi OMS ne’ebé publika hosi AFP, Domingu (12/12/2021).

Bainhira detekta varian Omicrom, Governu India foti kedan asaun hodi halo prevensaun ba virus ne’e. Foto/REUTERS.

Ho rezultadu peskiza ne’e, OMS subliña katak, infesaun virus corona variante Omicron ne’ebé laiha síntoma, halo organizasaun mundiál ne’e iha korajen liu tán atu kontinua halibur dadus barak liu tán hodi hatene di’ak liu tán variante ne’e ninia potensialidade no abut.

Peskiza ne’e halo, hafoin Áfrika Súl relata kona-bá deskobrimentu variante foun ida-ne’e ba OMS iha 24 Novembru.

Iha mós matenek na’in barak mak deskobre uluk ona katak, Omicron da’et lais liu no iha posibilidade boot atu halo vasina sira ne’ebé  iha ona la funsiona hotu.

Kona-bá ne’e, produtór sira vasina Covid-19 nian deklara katak,  sira-nia efetividade produtu vasina bele kontra Omicron. Produtór Pfizer/BioNTech mós deklara katak, ho efetividade doze dala tolu bele tahan no aumenta ema nia imunidade atu bele kontra variante foun. (**/Am)