Hatutan.com (14 Dezembru 2021) Díli—Hahú fulan Janeiru to’o Outubru 2021, Tribunál Distritál Díli (TDD) konsege fó Liberdade kondisionál ba kondenadu hamutuk na’in 70-resin, hosi prizaun Becora.
Kritéria atu hetan Liberdade kondisionál mak hanesan, kondenadu tenke kumpri ona metade de pena, relatóriu reinsersaun sosiál kriminolojia, relatóriu avaliasaun komportamentu hosi prizaun ne’ebé hatudu bom komportamentu no ikus liu maka kondenadu hakarak atu sai.
Notísia iha Relasaun: Xefe Estadu Sei Fó Indultu ba Prizioneiru Na’in 11
Tribunál simu lista kondenadu no relatóriu avaliasaun komportamentu hosi prizaun Becora, hodi tetu no ikus mai TDD mak deside fó liberdade kondisionál ba kondenadu sira, maibé laiha limitasaun ba kualkér krime.
“Laiha limitasaun ba kondenadu sira bainhira sira kumpri ona metade de pena, sira iha direitu atu hetan Liberdade kondisionál hosi TDD ba kualkér krime. Maibé, bainhira TDD fó ona liberdade kondisionál maka bainhira sira sai ba moris hamutuk fali iha sosiedade nia leet, labele halo tán krime. Bainhira halo tán krime ruma maka kondenadu sira sei ba fali prizaun hodi kumpri fali pena restu ou metade de pena ne’ebé seidauk hotu,” Juis administradór TDD, Afonso Carmona hateten ba Hatutan.com iha knaar fatin TDD, Tersa (14/12/2021).
Tanba ne’e, antes sira hetan Liberdade kondisionál hosi TDD, husu atu fila ba komunidade nia leet hodi hatudu hahalok ne’ebé di’ak, buka serbisu no halo atividade ne’ebé bele fó benefisiu ba sira nia a’an rasik no ba ema seluk.
Hosi númeru kondenadu ne’ebé hetan ona Liberdade kondisionál, maioria hosi sira nia defeza mak hatama pedidu ba prizaun, hodi submete lista naran ba TDD no balun hosi avaliasaun prizaun rasik.
Iha 25 Novembru 2021, Diretór estabelesimentu prizaun Becora, João Domingos informa katak, totál dadur iha prizaun Becora hamutuk 925, kompostu hosi kondenadu 402 no prizaun preventiva 523.
Jornalista: Carmelita Isaac
