Família Simu Ona Mate-isin Traballadór SWP

Hatutan.com, (15 Dezembru 2021), Díli—Mate-isin Germenino de Deus hanesan traballadór Timor-oan ida ne’ebé ba serbisu iha Austrália liu hosi programa Seasonal Worker Program (SWP) iha tinan 2019.

Aviaun Airnorth ne’ebé tula mate-isin Germenino de Deus traballadór Timor-oan ida ne’ebé ba serbisu iha Austrália liu hosi programa Seasonal Worker Program (SWP). Foto/Média SEFOPE.

Iha loron 23 Novembru akontese insidente rai-lakan, rezulta traballadór ne’e hakotu nia peregrinasaun iha mundu, iha loron 27 Novembru 2021, iha ospitál Royal Darwin.

Mate-isin transporta ona mai Timor no to’o iha Aeroportu Internasionál Prezidente Nicolau Lobato iha Kuarta dadeer tuku 06:00 otl, ho aviaun Arirnorth ne’ebé simu direta hosi parte Sekretáriu Estadu Formasaun Profisionál no Empregu (SEFOPE), liu hosi Diretór Diresaun Nasionál Empregu Exteriór, Filomeno Soares, hamutuk ho adidu traballu Timor-Leste nian iha Austrália Tomas de Araújo Guterres ho hodi entrega kedan ba família atu hala’o serimónia funerál tuir tradisaun Ermera ni’an.

Filomeno Soares, reprezenta Governu, hato’o profunda sentida kondolénsia ba família matebian, no enkoraza matebian nia-kaben Maria Gorrete atu forsa nafatin hodi hasoru situasaun ne’e.

Matebian Germenino de Deus moris iha 01 Jullu tinan 1987, iha suku Dukurai postu administrativu Letefoho, Munisípiu Ermera.

Matebian nia aman naran Elias Soares no inan naran Elda Soares.

Jornalista: Carmelita Isaac