Kazu Eis-Ministru MAE, Arguidu Rekoñese Asina Pedidu Pagamentu

Hatutan.com (16 Dezembru 2021), Díli—Tribunál Distritál Díli iha Kinta loron 16 fulan ne’e, kontinua hala’o julgamentu ba krime partisipasaun ekonomia no negósiu ne’ebé deskonfia involve eis-Ministru Administrasaun Estatál no Ordenamentu Territoriál (MAE) iha tinan 2010, arguidu Arcângelo de Jesus Gouveia Leite ho funsionáriu públiku na’in-haat hanesan arguida Rosa Amaral Vong, arguidu Angelo Urbano Fernandes, Agostinho Ximenes, Domingos Monteiro no Diretora empreza Nautetu Unipesoal Lda arguida Maria de Fátima Imaculada Correia Costa Bello no Diretór empreza Lifau Indah Unipesoal Lda, arguidu Fernando Mak.

Foto/Ilustrasaun hosi Google.

Iha julgamentu kontinuasaun ne’e, arguidu Angelo Urbano Fernandes ne’ebé iha momentu ne’ebá asumi kargu hanesan Diretór Finansa MAE, rekoñese nia parte asina pedidu pagamentu primeiru bazeia ba relatóriu hosi Ministériu Obras Publika ne’ebé hetan ona aprovasaun.

Tanba ne’e, nia parte laiha razaun atu labele asina pedidu pagamentu, maibé depois de asina pedidu pagamentu ne’e submete dokumentu ba Ministériu finansa (MF) mak halo pagamentu direta ho empreza.

Nia deklara, Ministériu Finansa mak loke tenderizasaun inklui halo pagamentu ba projetu konstrusaun edifísiu foun Câmara Munisípiu Baucau no Oecuse iha tinan 2010.

Ministériu Públiku akuza arguidu Arcângelo de Jesus Gouveia Leite, arguida Rosa Amaral Vong, Angelo Urbano Fernandes ba krime rua partisipasaun ekonomia no negósiu no arguida Maria de Fátima Imaculada Correia Costa Bello no Fernando Mak ba krime Burla Agravadu, arguidu Agostinho Ximenes, Domingos Monteiro ba krime Administrasaun Danoza ne’ebé previstu iha artigu 299, 267, 274 hosi kódigu penál Timor-Leste, relasiona ho konstrusaun edifísiu foun câmara Munisipiu Baucau no Oecuse iha tinan 2010 ne’ebé fo prezuizu ba Estadu ho montante Global ba projetu rua $147,024.44.

Audiénsia julgamentu ne’e prezide hosi juiz kolektiva Antónia Carmona, Ercilia de Jesus, Albertina Neves no MP reprezenta hosi Prokuradora Lídia Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo.

Jornalista: Carmelita Isaac