Desportu
Kalbuadi, Francisco ho Nilton Kandidatu Forte ba Prezidente FFTL 2022–2026
Hatutan.com, (22 Dezembru 2021), Díli—Iha ema na’in tolu kompostu hosi Francisco Kalbuadi Lay, Francisco Martins da C. P. Jerónimo ho Nilton Telmo Gusmão dos Santos mak kandidatu forte ba Prezidente Federasaun Futeból Timor Leste (FFTL), períudu 2022 to’o 2026.
Komité Eleitorál hamutuk ho Komité Judisiáriu FFTL hala’o Konferénsia Imprensa iha sede FFTL Bairro dos Grilhos, Kuarta (22/12/2021). Foto/Hatutan.com
“Kandidatu potensiál tolu ne’e sei kompete ba kargu Prezidente FFTL. Francisco Kalbuadi Lay propoin hosi asosiasaun tolu, Francisco Martins da C. P. Jerónimo propoin hosi asosiasaun ida no Nilton Telmo Gusmão dos Santos propoin hosi asosiasaun ida,” Portavóz Komité Eleitorál hamutuk ho Komité Judisiáriu FFTL, Virna de Carvalho hateten iha sede FFTL Bairro dos Grilhos, Kuarta (22/12/2021).
Komité Eleitorál hamutuk ho Komité Judisiáriu FFTL hala’o anunsiu ba kandidatura Komité Ezekutivu Períudu 2022–2026, tuir estatutu FFTL Artigu 37 kona-bá Kritériu Kandidatura no Kódigu Eleitorál Artigu 11, ne’ebé tuir planu sei hála’o kongressu eletivu iha loron 26 Fevereiru 2022.
Hosi rezultadu verifikasaun dokumentu ne’ebé komité eleitorál no komité judisiáriu halo hatudu, katak iha kandidatu tolu mak prienxe kritériu hodi kandidata an ba prezidente FFTL atu bele asume responsabilidade ezekutivu iha períudu ida nia laran hodi dezenvolve Futeból iha Timor-Leste.
Francisco Kalbuadi Lay, antes ne’e asume ona kargu nu’udár Prezidente FFTL ba períudu rua no oras-ne’e daudaun asume responsabilidade nu’udár Vise-Prezidente ba iha Asean Football Federation no Presidente Komité Kompetisaun AFF.
Kandidatu seluk Francisco Martins da C. P. Jerónimo, Atuál Prezidente FFTL no Membru Komité Finansas AFF, enkuantu Nilton Telmo Gusmão dos Santos, atuál Prezidente Liga Futebol Timor-Leste no sai mós hanesan pioneru ba dezenvolvimentu Futeból iha Timor-Leste ba tinan tolu ikus.
Alende ne’e, Komité Eleitorál hamutuk ho Komité Judisiáriu FFTL mós simu lista kandidatura ba iha kargu Vise Prezidente hanesan Domingos Raul ‘Falur Rate Laek’, Atual Vise-Presidente FFTL no Aleixo da Silva Gama ‘Cobra’, atuál Vise-Prezidente FFTL.
Iha mós kandidatura ba Kargu Membru Ezekutivu Feto ne’ebé kompostu hosi Engracia Pimentel Fernandes, Sekretária Jerál Assosiasaun Futeból Feminino no Maria Terezinha Viegas, Atuál Membru Ezekutivu FFTL.
Hosi kandidatu hirak ne’e atu kompleta estrutura FFTL nian, Komité Eleitorál hamutuk ho Komité Judisiáriu FFTL simu mós Kandidatura ba Kargu Membru Ezekutivu ne’ebé kompostu hosi ema na’in ulau hanesan Marito Belo, Prezidente Assosisaun Futeból Baucau, Henrique da Costa, atuál Membru Ezekutivu FFTL no Prezidente Assosiasaun Futsál, Faustino G. G. da Costa, atuál Membru Ezekutivu FFTL, Augusto Henrique, atuál Membru Ezekutivu FFTL no Prezidente Assosiasaun Futeból Covalima, Ângelo Lopes, atuál Membru Ezekutivu FFTL no Prezidente Assosiasaun Futeból Lautém, Aniceto Gouveia ‘Berlelo’, Prezidente Assosiasaun Arbitragem Futeból, Ipólito Soares, Prezidente Assosiasaun Dili Oeste no ikus liu Ricardino S. dos Reis, atuál Membru Ezekutivu FFTL no Prezidente Assosiasaun Futeból Aileu.
Komité Eleitorál hamutuk ho Komité Judisiáriu FFTL husu atu kandidatura sira ne’ebe mak mensiona iha leten, tenke kompleta hikas dokumentu sira mak hanesan, Rejistu Kriminál orijinál, Foto colorido ho medida 4×6 tahan 4 (ba kandidatu sira ne’ebe mak sidauk kompleta) no rerejistrasaun sei loke iha loron 5-12 fulan Janeiru 2022, la inklui loron Sábadu no Domingu.
Komité Eleitorál hamutuk ho Komité Judisiáriu FFTL rejeita atu fó-sai assosiasaun proponente ba kandidatura sira no husu atu media no públiku bele asiste direta iha loron kongressu.
Jornalista: Vito Salvadór