Justisa & Krime
Utiliza Veíkulu Estadu iha Loron Feriadu Komete Krime Pekulatu Ba Uzu
Hatutan.com, (22 Dezembru 2021), Díli– Funsionáriu Públiku ho Ajente Administrasaun Públiku sira ne’ebé kontinua utiliza veíkulu (karreta no motór) Estadu iha loron feriadu nasionál sira no sábadu ho domingu, laiha karta autorizasaun, konsidera komete krime pekulatu ba uzu. Tanba ne’e sei aplika sansaun ne’ebé define iha artigu 9 DK Nu.8/2003 inklui sansaun hirak-tuir mai ne’e;
a). Advertensia
b). Bandu atu lori karreta Estadu durante fulan-ida (1) no koima $10
c). Bandu atu halo kondusaun durante fulan-neen (6) no aplika koima $50
d). Hapara totalmente la uza veíkulu estadu
Notísia iha Relasaun: KAK Identifika Funsionáriu Na’in-Sanulu Uza Karreta Estadu Durante Finadu
Ekipa Fiskalizasaun Konjunta halo inspesaun ba ministeriu sira hodi kontrola karreta Estadu labele halo viajen iha loron Finadu. Foto/Dok. Hatutan.com
Komisaun Anti-Korrupsaun (CAC, sigla portugés) iha tinan ne’e konsege halo apreensaun ba karreta Estadu nian hamutuk lima (5) no motór Estaud nian hamutuk haat (4) ne’ebé utiliza iha loron feriadu no submete ona ba Ministériu Públiku ho penalizasaun selu multa no balun hetan suspensaun.
Ekipa konjunta kompostu hosi Komisaun Anti-Korrupsaun (CAC), Diresaun Nasionál Transporte no Terrestre (DNTT), Diresaun Nasionál Patrimóniu Estadu (DNPE) ho Polísia Nasionál Timor-Leste (PNTL) kontinua halo operasaun iha terrenu atu kontrola veíkulu Estadu ne’ebé ema utiliza iha ámbitu loron feriadu natal no tinan foun.
Adjuntu Komisáriu CAC ba asuntu Prevensaun no Sensibilizasaun, Luis de Oliveira Sampaio, Kuarta (22/12/2021), informa ba Hatutan.com iha nia servisu fatin, Díli, katak liu hosi rezultadu fiskalizasaun ne’ebé hala’o iha tinan kotuk konsege halo apreensaun ba veíkulu Estadu 100-resin no ba tinan ne’e veíkulu Estadu la to’o 10.
“Sira ne’ebe uza fora husi oras servisu ne’ebé laiha autorizasaun konsideradu hanesan krime pekulatu ba uzu ne’ebé prosesa hotu ba ona iha Tribunál, maibé kona-bá prosesu iha Tribunál ami la halo akompañamentu no maioria selu multa no suspensaun no kona-bá multa sira selu diretamente ba kofre Estadu,” Luis de Oliveira Sampaio hateten.
Medida ne’ebé aplika ona iha loron-boot finadu sei kontinua iha loron Natal no tinan foun, tanba ne’e ekipa konjunta sei halo koordenasaun hodi halo inspesaun iha kada Instituisaun Estadu hodi aviza antes tama loron Natal no tinan foun katak karreta Estadu mantein iha fatin servisu.
Luis de Oliveira Sampaio, afirma katak tuir loloos instituisaun Estadu sira iha tenke ona konsiente katak loron boot Natal no tinan foun ho loron feriadu universal ne’ebé laiha ligasaun ho atividade interese públiku, la presiza utiliza veíkulu Estadu no la presiza ona atu Ekipa konjunta halo alerta ba sira.
Iha ámbitu feriadu natal no tinan foun, ekipa konjunta mós sei koordena ho Polísia munisipál, liu husi sirkulár ne’ebé iha katak bainhira hetan FP lori karreta Estadu husi Díli ba munisípiu sira sei atua no koordena mai CAC.
Lei númeru 8/2013 kona-bá utilizasaun veíkulu Estadu katak utilizasaun ba de’it fins de interese públiku, hahú husi tuku 7:00 dadeer to’o tuku 7:00 kalan, maibé iha esepsaun ba kargu xefia hanesan Diretór Jerál, Ministru no Sekretáriu Estadu, nafatin utiliza ho ba interese públiku tanba konsiderasaun kargu xefia to’o Ministru dalaruma hala’o servisu fora husi oras servisu normal.
Jornalista: Carmelita Isaac