Hatutan.com, (26 Dezembru 2021), Díli—Feto na’in-ida entrega an ba Komandante Unidade Patrullamentu Fronteira (UPF), Postu Fatumea, Munisipiu Covalima, tanba tama ilegál mai territóriu nasionál liu husi liña fronteira Mota Welalas ne’ebe fronteira besik kedan ho área Indonézia, iha Domingu (26/12/21) tuku 07 dadeer.
Feto ida ne’ebé tama illegal liu hosi fronteira Terrestre Mota Welalas Covalima, Domingu (26/12/21). Foto/Média MI.
“Sidadaun ne’e ho konsiénsia rasik hodi entrega an ba UPF postu Fatumea,” Hatutan.com sita deklarasaun Komandante UPF, Superintendente Polísia Euclides Belo, liu hosi Komunikadu.
Sidadaun feto ne’e ho naran inisiál DfB idade 23, mai hosi aldeia Mota-Ulun, Suku Alas Tehen, Postu Administrativu Fatumea, Munisipiu Covalima.
Advertisement
Iha deklarasaun hosi sidadaun ne’e katak, nia tama ilegál ba Atambua iha tinan 2020 liu hosi Mota Welalas ho objetivu atu ba haree nia oan moras no la konsege salva nia oan nia vida no ohin deside fila hikas mai Timor-Leste hodi aprezenta ba UPF.
Hafoin halo identifikasaun ba sidadaun ne’e, UPF postu Fatumea entrega ona ba ekipa saúde Fatumea hodi submete ba kuarentena.