Hatutan.com, (28 Dezembru 2021), Díli—Papa Francisco sei hala’o serimónia beatifikasaun ba Papa João Paulo I, iha prasa São Pedro Vatikanu, Roma iha loron 04 Setembru tinan 2022.
Papa João Paulo I nu’udár Papa ne’ebé ninia durasaun Papál durante loron 33 de’it no sai nu’udár Papa ne’ebé ninia knaar ho tempu badak liu iha istória Igreja Katólika nian.
Papa João Paulo I batizadu nu’udár Albino Luciani, ne’ebé baibain temi “Papa do Sorriso” eleitu iha tinan 1978 hanesan Papa ba dala-263 iha Igreja Katólika.
Advertisement
Hafoin hili sai Papa, liu fulan ida de’it John Paul I husik-iis, tanba sofre moras kardiáku ka moras fuan nian iha loron 28 fulan Setembru kalan.
Iha loron 13 fulan Outubru, Papa Francisco aprova dekretu Kongregasaun ba Serbisu Ema Santu Sira nian, hodi konsidera no aprova milagre-sira ne’ebé iha ligasaun ho Papa João Paulo I.
Artigu ida ne’ebé hakerek hosi Stefania Falasca di Avvenire, Papa João Paulo I nu’udár Papa ba da-neen iha sékulu-20 ne’ebé liu hosi prosesu beatifikasaun.
Papa haat seluk kanonizadu ona mak hanesan: São Pio X, São João XXIII, São Paulo VI no São João Paulo II.
Iha Igreja Katólika, beatifikasaun (mai hosi lian Latin “beatus“, ida ne’ebé haksolok) katak, deklarasaun ka testemuña ida ne’eb’e oferese hosi Igreja ba ema ne’ebé mate ona katak ema ne’e ema ksolok-na’in duni.
Advertisement
Beatifikasaun ne’e oferese ba ema ne’ebé konsideradu iha nia moris tomak ne’e serbisu makás no serbisu-na’in ba ema barak nia di’ak no iha priviléjiu espiritualmente.
Beatifikasaun presija prova hanesan milgare (eseptu ba sira ne’ebé mate nu’udár mártir), hanesan prova katak, ema ne’ebé konsideradu Santu ne’e iha ona Lalehan no bele harohan da’et ba ema seluk.
Ema ne’ebé hetan ona beatifikasaun nia hetan títulu “beato” ba mane no “beata” ba feto (Lian Inglés: Blessed).
Prosesu ne’e nu’udár faze da-toluk hosi faze haat iha prosesu kanonizasaun ne’ebé baibain halo hafoin hetan títulu venerabilis (ema ne’ebé merese duni atu hetan respeitu) antes hetan titulu santo ka santa. (**/Am).