Hatutan.com, (28 Dezembru 2021), Díli– Liuhusi primeira interrogatóriu iha Tribunál Distritál Díli (TDD), Tersa (28/12/2021), Juiza Maria Solana, deside no aplika medida koasaun prizaun preventiva ba arguidu JDC ne’ebé deskonfia oho nia fen Domingas no hakanek oan nain-rua; ida ho idade tinan tolu no ida seluk tinan haat.
Arguidu oho fen no hakanek oan nain-rua (klaran) krumpre prizaun preventiva, 28 Dezembru 2021. Foto/Hatutan.com
Tribunál aplika medida koasaun ne’e ba arguidu tanba konsidera adekuadu no iha indísiu forte hodi lori arguidu ba medida koasaun prizaun preventiva.
Defensor Públiku, João Carvalho, ne’ebé fó asisténsia legal ba arguidu JDC aseita ho medida koasaun ne’e, tanba adekuadu ba nia kliente hodi asegura arguidu nia prezensa durante investigasaun.
Iha primeiru interrogatóriu ne’e, Ministériu Públiku liuhusi Prokuradór Ricardo Leite, promove arguidu ba krime omisídiu agravadu no tentativa omisídiu dala rua ne’ebé previstu iha artigu 142 husi kódigu penal Timor-Leste.
Advertisement
Hafoin primeira interrogatóriu ne’e Polísia lori kedas arguidu ba prizaun Becora hodi kumpre medida koasaun ne’ebé Tribunál aplika.
Polisia Servisu Investigasaun Munisípiu Liquiça detein arguidu iha sela tanba taa nia fen iha parte ulun, kakorok ne’ebé rezulta lezada mate fatin no hakanek nia oan nain-rua iha loron 23 fulan-Dezembru 2021 iha Aldeia Vatubou, Munisípiu Liquiça.