Justisa & Krime
Arguidu Violasaun Seksuál Hasoru Oan-Hakiak Tama Prizaun
Hatutan.com, (28 Dezembru 2021), Díli- Tribunal Distritál Dili (TDD), Tersa (28/12/2021), liuhusi primeiru interrogatóriu deside aplika medida koasaun prizaun preventiva ba arguidu ho inisiál VS ne’ebé deskonfia halo aktu violasaun seksuál ba menór hasoru nia-oan hakiak (anak tiri) hodi hakotu mós vítima ho inisiál CED (idade tinan 11) nia vida.
Notísia iha Relasaun: Autoridade Seguransa Indonézia Deporta Suspeitu Kazu Insestu Mai TL
Autoridade Polísia lori argguidu ba kumpre prizaun preventiva, 28 Dezembru 2021. Foto/Hatutan.com
Juiza Maria Solana aplika medida koasaun ne’e tanba konsidera iha indísiu forte ba krime aktu violasaun seksuál no omisídiu. Alende ne’e, asegura arguidu nia prezensa durante prosesu investigasaun, tanba antes ne’e arguidu halai subar ona ba Indonézia.
Iha primeiru interrogatóriu ne’e, Prokuradór António Tavares, ne’ebé reprezenta Ministériu Públiku promove arguidu ba krime aktu seksuál agravadu ba menór no omisídiu simples ne’ebé previstu iha artigu 177 no 139 husi kódigu penal Timor-Leste.
Hafoin Tribunál aplika medida koasaun ne’e, Polisia kedas arguidu ba prizaun Becora hodi kumpre medida koasaun ne’ebé Tribunál aplika ona.
Iha loron 25 fulan-Dezembru ne’e, autoridade Seguransa Indonézia deporta arguidu husi Indonézia mai Timor-Leste liuhusi Fronteira Terrestre Batugade, Bobonaro, hafoin arguidu hakat fronteira terrestre liu dalan ilegál no hetan kapturasaun hosi Polísia Repúblika Indonézia (PolRes) Kupang, Timor Osidentál.
Deskonfia arguidu halo aktu violasaun seksuál hasoru nia oan hakiak ho inisiál CED, idade tinan 11, no baku mate vítima, iha Aldeia Moris Foun, Suku Comoro foin lalais.
Jornalista: Carmelita Isaac