Polítika
PR Bele Dekreta Kalendáriu Eleisaun Prezidensiál iha Janeiru
Hatutan.com, (30 Dezembru 2021), Díli-Governu propoin ba Prezidente Repúblika, Francisco Guterres “Lú Olo” atu bele dekreta kalendáriu ba eleisaun prezidensiál iha fulan-Janeiru mai ne’e.
Notísia iha Relasaun: Eleisaun 2022 ho 2023, Governu Aumenta Sentru Votasaun husi 885 ba 1.200
PM Taur Matan Ruak halo enkontru ho PR Francisco Guterres “Lú-Olo”. Foto/Mídia GPR
Iha enkontru semanál entre Primeiru-Ministru, Taur Matan Ruak ho Prezidente Repúblika, Francisco Guterres “Lú Olo” ne’ebé akompaña mós husi Ministru Administrasaun Estatál, Miguel Pereira de Carvalho, iha Palásiu Prezidensiál, Kinta (30/12/2021), parte sira ko’alia no partilla ba malu kona-bá preparasaun eleisaun prezidensiál 2022.
Ba jornalista sira, PM Taur Matan Ruak, hateten enkontru ida-ne’e espesiál ho Prezidente Repúblika tanba Prezidente hakarak rona Governu nia hanoin no Governu nia pozisaun kona-bá eleisaun prezidensiál.
“Iha enkontru ohin, ami ko’alia kona-bá data eleisaun nian no Governu halo komentáriu de’it, markasaun ne’e kompeténsia PR nian no ha’u hanoin to’o tempu PR dekreta, ita hotu bele hatene data ne’e saida, mas kualkér forma ita iha fulan-Janeiru ba oin ne’e, ita iha fulan-rua ka tolu de’it ona,” Primeiru-Ministru Taur Matan Ruak esplika.
Taur hatutan, Governu propoin maizumenus iha fulan-Janeiru nia laran PR bele dekreta, mais data konkreta ne’e iha PR nia liman no Governu labele pronunsia bua ruma antes.
“Dezafiu ne’ebé ita preokupa mak variante foun COVID-19 ho naran Omicron ne’ebé agora iha ona Australia, Indonézia inklui mos nasaun seluk no ita espera ida-ne’e la bele mai maibé ita tenke prepara an para buat hotu bele la’o di’ak no preparativus seluk la’o di’ak hotu,” Taur tenik.
Taun Matan Ruak fó garantia ba PR katak uainhira dekreta ona loron eleisaun nian, Governu iha papél atu implementa no prepara kondisaun téknika lojístika hotu para eleisaun ne’e bele la’o di’ak tanba Governu iha STAE no CNE sira iha funsaun ba ida-ne’e.
Jornalista: Vito Salvadór