Hatutan.com, (04 Janeiru 2022), Díli- Arguidu ho inisiál DS ne’ebé deskonfia tuda postu polísia Manleu, iha kalan 31 fulan-Dezembru 2021, hetan Termu Identidade Rezidénsia (TIR).
Arguidu tuda Postu Polísia iha Manleu, Díli, 31 Dezembru 2021. Foto/Hatutan.com
Liuhusi primeira interrogatóriu iha Tribunal Distritál Dili (TDD), Tersa (04/01/2022), Tribunál aplika medida koasaun TIR tanba deskonfia tuda no harahun Postu Polísia Manleu, Díli no Tribunál mós konsidera laiha indísiu forte hodi lori arguidu ba prizaun preventive. Maske nune’e, medida koasaun ne’e hodi hein prosesu investigasaun.
Iha primeiru interrogatóriu ne’e, Ministériu Públiku promove arguidu ba krime danu agravadu ne’ebé previstu iha artigu 259 husi kódigu penal Timor-Leste.
Iha kalan 31 Dezembru 20021, arguidu hemu-lanu hodi tuda postu Polísia Manleu, tanba ne’e PNSIK kumpre mandadu detensaun husi Tribunál hodi detein arguidu hafoin submete ba primeiru interrogatóriu.
Primeiru interrogatóriu ne’e prezide husi Juiza singular Albertina Neves, Ministériu Públiku reprezenta husi Prokuradór Renato Berenahak no arguidu hetan asisténsia legal husi Defensor Públiku João Carvalho.
Jornalista: Carmelita Isaac