Horta, Timoroan Dahuluk Simu Booster Pfizer iha TL

Hatutan.com, (04 Janeiru 2022), Díli—Premiadu Nobel ba Pás, José Manuel Ramos Horta, hanesan Timoroan dahuluk ne’ebé simu vasina Booster Pfizer iha Timor-Leste (TL).

Premiadu Nobel ba Pás, José Manuel Ramos Horta, hanesan Timoroan dahuluk ne’ebé simu vasina Booster Pfizer iha Timor-Leste (TL), iha rezidénsia Metiaut Díli, Tersa (04/12/2022). Foto/Hatutan.com.

“Ohin ha’u simu terseira doze bolu Booster Pfizer, booster ne’e hahu tiha ona iha Europa, Amérika, Austrália desde Abríl 2021,” José Ramos Horta, hateten ba jornalista sira iha rezidénsia Metiaut Díli, Tersa (04/12/2022).

Notisia iha Relasaun:OMS: Omicron Da’et Lais Liu Delta

Booster Pfizer atu garante sidadaun sira livre hosi infesaun COVID-19 iha Timor-Leste, no Governu liu hosi Ministeriu Saúde (MS) halo esforsu hodi fo tán vasina ida-ne’e.

Horta hakarak simu vasina ida-ne’e tanba baibain efetividade vasina ida, nia durasaun badak loos, iha de’it fulan neen, balun fulan hitu no balun fulan ualu, nune’e iha terseira doze bele aumenta imunidade hasoru Covid-19.

Premiadu Nobel ba Pás ne’e konsidera TL iha sorte tanba iha 2021 Covid-19 sa’e makás maibé ho esforsu Governu nian hodi vasina komunidade ikus-mai iha duni reduasaun.

Oras-ne’e daudaun Amérika infetadu Covid-19 kada loron, Austrália uluk kontrola di’ak loos agora susar, Nova Zelándia agora susar no Xina hahú fila-fali úniku mak mutuasaun ida, atuál hanaran Omicron nia infesaun makás, lalais maibé ladún fatál,  ladún mortál.

“Husu atu komunidade ne’ebé halo ona segunda doze liu tiha ona fulan neen, bainhira Governu ka autoridade sira oferese vasina Booater, tenke ba simu tanba ne’e ajuda proteje an hosi Covid-19,” Ramos Horta apela.

Horta rasik mak husu atu simu vasina Booster Pfizer tanba sei halo viajen ba Dubai iha tempu badak atu partisipa enkontru prezensiál nu’udár ekipa juri internasionál ba prémiu Fraternidade Humana ne’ebé estabelese hosi Papa Francisco.

Eis Prezidente Repúblika ne’e rekoñese katak, Booster Pfizer ne’ebé foin simu ne’e liu tiha semana rua to’o tolu mak foin efikáz, la’ós ohin simu fó kedan protesaun.

Desde 2020, lider nasionál ne’e sempre halo esforsu hotu hosi Governu nia kotuk atu TL bele hetan vasina ba protesaun hasoru Covid-19.

Jornalista: Vito Salvadór