Operasaun “Haberan” Detein Membru PNTL ho F-FDTL Na’in-rua

Hatutan.com, (04 Dezembru 2022), Dili—Operasaun konjunta hanaran “Haberan” ne’ebé hala’o hosi instuisaun Polísia Nasionál Timor-Leste (PNTL), Departamentu Justisa Profos, no FALINTIL Forsa Defeza Timor-Leste (F-FDTL), Unidade Polísia Militár (PM), konsege kaptura no detein membru na’in-rua.

Enseramentu Operasaun konjunta “Haberan” ne’ebé kompostu hosi Forsa Polísia Nasionál Timor-Leste (PNTL), Departamentu Justisa Profos, no FALINTIL Forsa Defeza Timor-Leste (F-FDTL), Unidade Polísia Militár (PM), iha Kuartel Jerál PNTL, Caicoli, Tersa (04/01/2022). Foto/Hatutan.com.

Membru na’in-rua ne’e,  ida hosi PNTL no ida seluk hosi F-FDTL, iha área Kuluhun, tanba mosu dezintendimentu ba malu, kauza hosi tua lanu.

Xefe departamentu Justisa PNTL, Superintendente Xefe Polísia, Agostinho Gomes da Silva hateten prosesu kapturasaun ba membru na’in-rua ne’ebé komete aktu krime ne’e, hala’o iha Sesta, 17 Dezembru 2021, iha área Kuluhun, Postu Administrativu Cristo Rei, Munisípiu Dili.

Forsa instituisaun rua ne’e halo kapturasaun tanba, alvu hosi operasaun ne’e atu kontrola membru polisia no militár ne’ebé sempre halo problema iha tempu loron boot, liu-liu iha natál ho tinan foun.

“Durante operasaun Haberan la’o, laiha problema boot ida mak mosu, mais iha duni kazu ida de’it iha Kuluhun, maka envolve membru PNTL ida no F-FDTL ida. Sira lanu, hanesan lanu maka mosu dezintendementu komunikasaun,” Superintendente Xefe Polisia, Agostinho Gomes da Silva, informa ba jornalista sira, hafoin enseramentu ba operasaun Haberan, iha Kuartel Jerál PNTL, Caicoli, Tersa (04/01/2022).

Bainhira ekipa operasaun Haberan simu informasaun kona-bá insidente ne’e, forsa rua responde kedan no lori individu rua ne’e, ida hosi F-FDTL, entrega ba iha kuartel PM, iha Kintál-boot, no membru PNTL ne’e, Profos entrega ba iha komandu Munisipiu Polisia Dili, hodi halo identifikasaun.

Prosesu kontinuasaum ba membru na’in-rua ne’e, bazeia ba Regulamentu Dixiplinár Militár (RDM) nian, kada instituisaun.

Xefe Departamentu Justisa PNTL, Agostinho Gomes da Silva, hateten tán katak, durante semana-tolu, iha forsa rua nia operasaun, laiha problema seluk ruma mak akontese, tanba forsa rua ho esforsu maka’as hodi halo patrullamentu no operasaun rutina iha terrenu.

Planu kontinuasaun, depende ba nesesidade no ordén hosi Komandante Jerál PNTL, Komisáriu Polisia, Faustino da Costa, ho Xefe Estadu Maior, Jenerál F-FDTL, Tenente Jenerál, Lere Anan Timur, tanba forsa unidade rua ne’e, prontu atu hala’o nafatin koordenasaun no kooperasaun ba halo operasaun.

Durante selebrasaun loron boot Santu Natál ho tinan foun 2022, departamentu justisa mós simu keixa hosi komunidade kona-bá atitude membru PNTL balun nian ne’ebé halo hasoru komunidade iha terrenu.

Jornalista: Rogério Pereira Cárceres