Hatutan.com, (06 Janeiru 2022), Díli— Taxa ezekusaun reál Fundu Covid-19 nu’udár Fundu Espesiál ne’ebé kria iha 2020 atu responde ba pandemia Covid-19 no jere hosi Ministériu Finansa (MF), to’o iha loron 31 fulan-Dezembru 2021, atinji millaun $200,9 ka 70% hosi totál orsamentu retifikativu alokadu millaun $287,6.
“Taxa ezekusaun ida-ne’e aas maske iha tinan kotuk Timor-Leste aplika restrisaun oi-oin ne’ebé limita movimentu ema no sasán sira, kauza hosi pandemia Covid-19, Inundasaun no períodu ezekusaun durante fulan hitu de’it, depoisde Prezidente Repúblika Promulga OJE Retifikativu iha fulan-Maiu 2021,” Hatutan.com sita komunikadu.
Notisia iha Relasaun:Ezekusaun OJE 2021 Trimestre Da-haat Atinji 73%, RAEOA 26% de’it
Antes ne’e, Ministériu Finansa mós halo projesaun ne’ebé bazeia ba fluxu kaixa no ritmu ezekusaun hosi Janeiru to’o Novembru, katak taxa ezekusaun reál Fundu Covid-19 to’o iha Dezembru 2021 sei atinji de’it 66%. Tinan kotuk, taxa ezekusaun reál Fundu Covid-19 atinji 58%.
Taxa ezekusaun tuir klasifikasaun ekonómiku, aas liu maka iha kategoria Bens no Servisu ne’ebé mak ezekuta millaun $149,5 ka 76% hosi orsamentu alokadu millaun $197,5.
Tuir kedan ho Transferénsia Públika ne’ebé mak ezekuta millaun $46,8 ka 62% hosi orsamentu alokadu millaun $75,9.
Kapitál Dezenvolvimentu ezekuta millaun $2,9 ka 36% hosi orsamentu alokadu millaun $8,1. Enkuantu Kapitál Menór ezekuta millaun $1,7 ka 28% hosi orsamentu alokadu millaun $5,9.
Tuir-mai progresu ezekusaun reál tuir medidas sosio-ekonómiku neen: i) Moratoria de Crédito ezekuta ona 100% hosi orsamentu alokadu millaun $2; ii) pagamentu Cesta Bázika ezekuta ona millaun $66,2 ka 97% hosi orsamentu alokadu millaun $68,1; iii) pagamentu suplementu remuneratóriu ba traballadór liña-frente ezekuta ona millaun $51,6 ka 97% hosi orsamentu alokadu millaun $53,4; iv) pagamentu izensaun propinas ba estudante ensinu superiór ezekuta millaun $11,1 ka 79% hosi orsamentu alokadu millaun $14; v) apoiu ba empregu ezekuta millaun $30,8 ka 68% hosi orsamentu alokadu millaun $45,3; vi) apoiu seguransa alimentár ezekuta millaun $7,2 ka 60% hosi orsamentu alokadu millaun $12; vii) apoiu pulsa internet ba estudante ensinu superiór ezekuta $872,2 mil ka 41% hosi orsamentu alokadu millaun $2; viii) prevensaun no mitigasaun Covid-19 inklui finansiamentu operasaun Sentru Integradu Jestaun Krize, ezekuta millaun $31,2 ka 37% hosi orsamentu alokadu millaun $83,4.
Jornalista: Cipriano Colo
