OJE 2022, CONECTIL Hetan $900.000 ba Elaborasaun Kurríkulu Edukasaun Katólika

Hatutan.com (13 Janeiru 2022) Díli—Comissão Nacional Educação Catolica Timor-Leste (CONECTIL) hetan orsamentu ho montante $900.000 hosi Orsamentu Jerál Estadu (OJE) 2022, ba elaborasaun kurríkulu Edukasaun Katólika.

Formasaun kontinua ba funsionáriu CONECTIL, ba preparasaun matéria ezame nasionál no lokál, 12 Fevereiru 2019. Foto/José Sequeira.

CONECTIL nu’udár komisaun edukasaun Conferência Episcopal Timorense (CET) ne’ebé halo elaborasaun kurríkulu edukasaun Katólika, liga ho matéria Relijiaun Katólika no Morál ba eskola Katólika no públiku iha territóriu nasionál.

“Orsamentu ba atividade CONECTIL nian ne’e, mai hosi suvensaun públiku ne’ebé Governu Timor-Leste atribui ba CET, iha Tinan fiskál 2022 CONECTIL  propoin $900.000, atu halo ezekusaun ba planu no atividade sira liuliu ba produsaun manuál, formasaun ba manorin na’in sira, administrasaun inklui saláriu vensimentu ba funsionáriu CONECTIL,” Prezidente CONECTIL, Padre Mateus Afonso, hateten ba Hatutan.com iha knaar fatin Praia dos Coqueiros, Kinta (13/01/2022).

Atividade ne’ebé CONECTIL halo, atu lori matéria Relijiaun Katólika ne’e sai ponte entre Igreja no edukasaun ka Estadu, ne’ebé kobre Ensinu Báziku to’o iha nível Ensinu Superiór no la’ós ba de’it eskola Katólika privada sira, maibé mós ba eskola Públiku sira.

“Ita mós hanoin liu hosi edukasaun Relijaun Katólika, Uma Kreda hatudu nia sentidu responsabilidade ba moris sosiedade ka povu sarani, hodi transmite valór Kristaun ba foin-sa’e sira atu bele haburas no habelar hahalok karidade, justisa, solidariedade no toleránsai iha sosiedade nia leet,” Padre Mateus Afonso, hateten.

Programa prinsipál ne’ebé CONENCTIL halo desde 2017 maka, fó formasaun ba manorin na’in sira matéria Relijiaun Katólika nian iha territóriu nasionál.

Iha formasaun ne’e, formadór sira sei introdús ba manorin na’in sira giaun ne’ebé CONECTIL prepara, relasiona ho matéria Relijiaun Katólika ba iha nível Ensinu baziku I,II no III siklu to’o iha nível Sekundáriu, atu manorin na’in sira iha giaun hodi bele sai  mata-dalan iha prosesu hanorin tuir padraun ne’ebé Ministériu Edukasaun Juventude no Desportu (MEJD) husu.

Problema ne’ebé CONECTIL sei enfrenta maka, seidauk iha manuál ba Matéria Relijiaun Katólika, nune’e durante ne’e la’o de’it ho giaun ne’ebé iha, ho formadór sira mai hosi Padre, relijiozu no relijioza sira ne’ebé kaer eskola Katólika iha Timor-Leste.

Prezidente CONECTIL ne’e promete katak, ho mandatu ne’ebé iha sei hakas an atu hamutuk ho formadór no ekipa tomak sei halo esforsu hodi prodús manuál atu sai nu’udár referénsia ba manorin na’in sira, hodi hanorin iha eskola hahú husi Ensinu Báziku to’o iha nível Sekundária, nune’e iha uniformizasaun ba pontus ezame ita territóriu nasionál.

To’o oras ne’e, CONECTIL rejista eskola hamutuk 809 ne’ebé kada tinan simu matéria Relijiaun Katólika hosi komisaun rasik.

Hosi númeru ne’e, CONECTIL rejista Eskola Ensinu Báziku Sentrál I, II no III siklu hamutuk 554 no nível Ensinu Sekundáriu 223, inklui Ensinu Tékniku Vokasionál hamutuk 32 iha territóriu nasionál.

Jornalista: Vito Salvadór