Atoni-oan Kontinua Terus ho Sistema Faan Billete Transporte Marítima

Hatutan.com, (15 Janeiru 2022), Díli—To’o oras ne’e Autoridade Portuáriu Timor-Leste (APORTIL), liu hosi Cabotage Nasionál ho Diresaun Nasionál Transporte Marítima (DNTM), seidauk iha Sistema própriu ne’ebé di’ak atu bele fasilita pasajeiru sira hosi Ataúro no Rejiaun Administrativa Espsiál Oecusse Ambeno bele sosa billet ho dignu.

Madre Sabina Martins Mota, hosi Congregação Dominicana. Foto/Hatutan.com.

Sistema ne’ebé durante tempu naruk pesoál sira uza hodi faan billete ró nian, utiliza arredór Portu Díli, pasajeiru sira hadau-malu, dudu-malu, sena-malu iha fatin ne’ebé la dignu.

Notisia iha Relasaun:Durante Operasaun, Ró Berlin Ramelau “Xoke” Dala-rua

Lázaro Meta nu’udár pasajeiru, konsidera Sistema ne’e la dignu no la merese ona atu uza tanba Timor ukun aan tinan 20 ona, Parte kompetente tenke buka ona mekanizmu di’ak atu halo atendimentu ba populasaun ho dignu tuir padraun ne’ebé mundu adopta.

Pasajeiru sira mós husu atu hadi’a oráriu faan billete, liuliu tenke faan loron ida antes, molok atu halo viajen ba RAEOA, la’ós ohin atu arranka mak foin faan fali billete, konserteza ema sei hada’u-malu iha portu nia oin, to’o halo engrafamentu oras ba oras.

“Ami nia preukupasaun primeiru maka oráriu faan tikete tenke muda. Sistema la di’ak, dala barak ema hadau malu to’o baku malu. Situasaun ne’e beibeik ona,” Lázaro Meta, preokupa.

Iha fatin hanesan, Madre Sabina Martins Mota hosi Congregação Dominicana, ne’ebé atu viajen ba Oecusse mós  preokupa ho sistema atendimentu kona-bá faan billete tanba, normalmente bainhira pasajeiru barak, sempre hadau malu iha Portu Díli.

Ró Berlin Ramelau. Foto/Hatutan.com.

“Situasaun ne’e ladún dignu. Ita ko’alia beibeik ona kona-bá situasaun ne’e, maibé laiha solusaun. Bainhira loos mak makaer ukun sir abele buka solusaun di’ak, nune’e bele trata ita nia emar sira ho dignu,” nia preokupa.

Hatán ba preukupasaun ne’e, diretór Cabotage Nasionál, Feliciano da Costa Correira, rekoñese katak mosu duni fallansu iha sistema faan billete iha Portu Díli, tanba dala-ruma fa’an tarde no ema barak mak mai hadau malu de’it  no laiha kondisaun di’ak.

“Ha’u hanoin ida ne’e, akontese bebeik, no ha’u mós lakohi nega katak, ne’e sé nia sala, lakohi fó kulpa bas sé. Ne’e akontese bebeik. Agora, ami nia problema mós, dala-ruma ami prepara billete ne’e mak tarde. Ami hanoin hela atu faan loro-loron, maibe seidauk iha disponibilidade. Ami sei koordena atu halo uniformizasaun, oinsá bele faan loro-loron,” diretór ne’e, rekoñese.

Feliciano mós rekoñese situasaun ne’e la’ós foin mosu, maibé dezde uluk kedan no parte Cabotage Nasionál sempre halo akompañamentu.

Tanba ne’e, parte Cabotage promete sei hadi’a sistema ne’e ho neneik iha Díli nune’e mós iha REAOA atu bele fasilita di’ak liu tán pasajeiru sira.

Jornalista: Rogério Pereira Cárceres