FFTL Atraza Selu Subsídiu no Premiu Jogu Ba Klube Sira iha LFTL

Hatutan.com, (17 Janeiru 2022), Díli-Sekretária Estadu Juventude (SEJD) rekoñese pagamentu 60% ba atividade Liga Futebol Timor Leste (LFTL) atraza tamba relatóriu tarde husi Federasaun Futeból Timor Leste (FFTL).

Notísia iha Relasaun: LFTL ho FFTL “hadau-malu” subsídiu rihun $310

Diretór Nasionál Administrasaun Finansas SEJD, Guido Monteiro. Foto/Espesiál

Tuir sistema  finansa públiku iha tinan ida nia rohan, orsamentu taka iha 23 fulan-Dezembru. Nune’e, bainhira  pedidu pagamentu sira tama atraza sei la bele halo pagamentu.

Diretór Nasionál Administrasaun Finansas SEJD,  Guido Monteiro ba Jornalista sira iha nia knaar fatin SEJD, Lecidere, Díli, Segunda (17/01/2022), informa diresaun nasionál alta kompetisaun halo esforsu tomak atu haruka pedidu pagamentu ba Ministériu Finansas (MF) iha data ikus,  maibé la konsege hetan pagamentu ba proposta husi SEJD relasiona ho orsamentu ba LFTL tamba sistema freebalance iha lorom 30 fulan-Dezembru taka, nune’e MF la konsege halo transferénsia ba banku sentrál no foin akontese fali iha loron 10 fulan-Janeiru ne’e ho montante $186,000.00.

“Iha kedas semana kotuk MF liu husi banku sentrál transfere tiha ona osan ba iha konta bankária FFTL nian atu halo pagamentu ba klube sira,” Guido Monteiro informa.

Diretór ne’e hatutan orsamentu iha ona FFTL nia konta, nune’e, prosesu pagamentu subsídiu no premiu do jogu ba klube sira depende ba FFTL bainhira mak halo fali transferénsia ba órgaun liga hodi kontinua prosesa pagamentu ba klube sira.

Prezidente Karketu Dili Fc, Adilson Ribeiro hateten molok liga ne’e la’o klube sira ho FFTL no órgaun LFTL iha ona akordu liu husi akta sira ba iha prémiu jogu no mós subsídiu, maibé hafoin kompetisaun remata to’o oras ne’e klube sira seidauk hetan sira-nia direitu.

“Too agora ami seidauk simu prémiu kampiaun no mós prémiu jogu sira,” Adilson Ribeiro hateten.

Situasaun hanesan akontese mós ba klube primeira divizaun Assalam Fc tamba hafoin termina to’o oras ne’e seidauk sinu subsídiu liga no mós prémiu do jogu.

Ho difikuldade ne’ebé iha, Hipolitu Soares, nu’udar prezidente Asalam Fc hateten to’o oras ne’e seidauk selu saláriu jogadór sira nian tamba klube la iha osan natoon atu halo pagamentu hafoin FFTL no LFTL la halo transferénsia ba konta bankária klube nian.

Hatán ba preokupasaun sira ne’e prezidente FFTL, Francisco da Costa Jerónimo hateten transferénsia subsídiu ba klube no Órgaun liga sei akontese iha loron 19 fulan-Janeiru 2022.

“Aban transfere ona tamba loraik ona ba banku taka,” Francisco Jerónimo tenik.

Antes ne’e, FFTL no Órgaun liga kumpre ona kompromisu hodi halo transferénsia subsídiu COVID-19 ba Klube hamutuk 18 ne’ebé kompete iha LFTL iha primeira no segunda divizaun no kada klube hetan $5,000.00 tuir akordu kada klube ne’ebé manan iha jogu sei hetan prémiu.

Jornalista: Vito Salvadór