Hatutan.com, (18 Janeiru 2022), Díli—Tribunál Distritál Díli (TDD), kontinua hala’o julgamentu ba kazu krime abuzu konfiansa agravadu no administrasaun danoza ne’ebé deskonfia envolve husi eis-koordenadór merenda eskolár Postu Administrativu Ataúro, arguidu ho inisiál IS.
Notísia iha Relasaun: Eleisaun ba Prezidente Repúblika Sei Realiza iha 19 Marsu 2022
Kazu krime ne’e relasiona ho konstrusaun armazén foos iha tinan 2018 no motorizada inklui mobiliáriu ne’ebé Ministériu Edukasaun (ME) oferese ba arguidu IS.
Iha audiénsia julgamentu kontinuasaun, Tersa (18/01/2022), sasin Sebastião Nani da Reissureição atuál Xefe Departamentu Merenda Eskolár iha Ministériu Edukasaun, Juventude no Desportu (MEJD) deklara, nia parte laiha koñesimentu kona-bá projetu konstrusaun armazén foos ne’ebé arguidu halo, inklui proposta ba Rotary Club of Moruya (IRCM) hodi husu apoiu $10,241.50.
“Ha’u la hatene kona-bá pedidu ne’ebé arguidu IS halo no projetu konstrusaun armazén foos ne’e,” sasin deklasa iha audiénsia. Hafoin rona sasin, Tribunal adia hikas julgamentu ba loron seluk hodi kontinua rona sasin sira seluk.
Notísia iha Relasaun: Sasin La Autoriza Eis Koordenadór Merenda Eskolár Halo Proposta
Jornalista: Carmelita Isaac
