Angela Freitas Kandidata an ba Prezidente Repúblika Dala Tolu Ona

Hatutan.com, (20 Janeiru 2022), Díli—Maski kandidata an ba Prezidente Repúblika dala rua ona iha periudu 2012-2017 no 2017-2021 no la konsege eleita, maibé tinan ida ne’e Maria Ángela Freitas da Silva, hakarak kandidata an dala ida tán hodi kompete iha eleisaun Prezidensiál ba dala tolu, periúdu 2022-2027.

Maria Ángela Freitas da Silva, “Ángela Freitas”. Foto/Facebook.

Kandidata independente ne’e, iha Kinta 20 Janeiru 2022 ho prontidaun tomak, deklara an ofisialmente ninia kandidatura hodi kompete iha eleisaun Prezidensiál, ne’ebé tuir planu sei akontese iha 19 Marsu 2022.

Notisia iha Relasaun:Armanda Fiar an Avansa ba Kandidatura Prezidensiál 2022-2027

“Ha’u, Maria Ángela Freitas da Silva, prontu kandidata an ba Prezidente Repúblika Demokratika de Timor-Leste periodu 2022-2027,” Ángela Freitas, deklara iha Bairro dos Grilhos, Kinta (20/01/2022).

Razaun ne’ebé halo nia hodi kandidata an ba PR, tanba haree ba konsekuénsia sira hosi impase polítika ne’ebé mosu dezde 2017 to’o ohin loron, obriga povu kontinua moris iha susar no terus ne’ebé laiha rohan.

Nia dehan, povu iha direitu atu moris dignu, asesu ba justisa ne’ebé mak hatuur ona iha konstituisaun RDTL.

Iha Sábadu 15 Janeiru 2022, Prezidente Repúblika (PR), Francisco Guterres “Lú Olo”, dekreta ona lei númeru 2/2022, kona-bá kalendáriu ba Eleisaun Prezidensial, sei realiza iha 19 Marsu 2022.

Jornalista: Rogério Pereira Cárceres