PNTL Submete ona Kazu Omesídiu Kampung Tuti ba Ministériu Públiku

Hatutan.com, (20 Janeiru 2022), Díli-Iha Kuarta 19 Janeiru 2022, tuku 22:51 mosu insidente ida iha área Kampung Tuti Bebonuk, Suku Madohi, Postu Administrativu Dom Aleixo, Munisípiu Díli, envolve hosi laen ho inisial ACP, oho nia kaben Esperança Dias de Brito, tanba de’it vitima husu osan hodi selu oan nia eskola.

Asistente Inspetór, Américo Fátima da Costa. Foto/Hatutan.com.

Osan ne’ebé vítima husu ba nia la’en ne’e ho objetivu atu uza ba selu sira nia oan nia osan eskola, iha Eskola Sekundária 04 de Setembru UNAMET, Díli. Maibé, tanba laen la fó ka osan laiha, ikus-mai vítima tenke simu realidade moruk ida-ne’e.

“Kazu ne’e akontese horkalan iha Bebonuk, kazu violénsia doméstika ne’ebé envolve feen ho laen. Kazu ne’e ninia motivu  tanba atu selu labarik nia eskola. Ninia feen husu osan ba ninia laen, atu selu labarik nia eskola mak, hetan violénsia to’o vitima mate fatin,” Komandante PNTL, Eskuadra Dom Aleixo, Asistente Inspetór, Américo Fátima da Costa, hateten iha Eskuadra Dom Aleixo, Ai-mutin, Kinta (20/01/2022).

Hafoin simu informasaun kona-bá insidente ne’e, komandu Munisípiu Díli, liuhosi Eskudra Dom Aleixo, to’o kedan iha fatin akontesimentu hodi halo atuasaun.

Bainhira to’o iha fatin insidente, Servisu Informasaun Kriminál (SIK), observa katak, suspeitu ho tudik, sona dala-barak iha vítima nia isin-lolon.

Suspeitu ACP ne’ebé Oho nia feen iha Kampung Tuti, Kinta (20/01/2022). Foto/Facebook.

Ho situasaun ne’e, Polísia kaptura kedan suspeitu iha sira-nia rezidénsia (kuartu laran), iha área Kampung Tuti, Bebonuk, Aldeia 20 de Setembru, Suku Madohi, Postu Administrativu Dom Aleixo, Díli.

“Entaun, ami lori suspeitu ne’e mai iha-ne’e, depois kontaktu kedan ho ambulánsia ba foti kedan vítima iha nia fatin. Kazu ne’e ami prosesa iha ne’e,” Asistente Inspetór, Américo Fátima da Costa, informa tán.

Prosesu identifikasaun identidade ba suspeitu ho inisiál ACP ne’e, Eskuadra Dom Aleixo konklui ona no iha Kinta 20 Janeiru 2022, submete ona kazu ne’e, ba Ministériu Públiku (MP), hodi kontinua prosesu investigasaun.

“Ohin dadersan, sira submete hotu kedan ona ba prosesu no agora detein ona suspeitu iha sela distritu Díli,” Komandante Américo, hateten.

Oras ne’e, vitima nia mate-isin, rai hela iha Sala Mortuáriu, iha Hospitál Nacional Guido Valadáres (HNGV), Bidau, hodi halo autópsia. Suspeitu ho vitima nu’udár feen-laen ne’ebé iha oan hamutuk na’in-lima.

Jornalista: Rogério Pereira Cárceres