GSS Tara-an Rasik iha Bairru-Pité

Hatutan.com, (21 Janeiru 2022), Díli—Iha Kinta 20 Janeiru, maizumenus tuku 18:23, joven mane ida ho inisiál GSS, foti desizaun hodi oho nia an rasik (mate) ho kondisaun tara-an, iha aldeia T.A.T, Suku Bairru Pité, Postu Administrativu Dom Aleixo, Munisípiu Díli.

Komandante PNTL Munisípiu Dili, Superintendente Xefe Hendrique da Costa. Foto/ Hatutan.com

Hafoin insidente ne’e, Polísia Nasionál Timor-Leste (PNTL), Komandu Munisipiu Díli, liuhosi Servisu Investigasaun Kriminál (SIK), VPU no Firensik, inklui médiku espesialista ida hosi Hospital Nacional Guido Valadáres (HNGV), hala’o ezaminasaun ba vítima.

Komandante Munisípiu Díli, Superintendente Xefe Polísia, Henrique da Costa, informa tuir rezultadu ezaminasaun externál ne’ebé hala’o hosi médiku espesiálista Patolojia ne’e, fó-sai katak vitima GSS mate, la’ós ema seluk mak oho, maibé nia rasik mak tara-an to’o mate, iha nia rezidénsia.

“Asidente tara-an ida iha área Dom Aleixo nian, ne’ebé mak iha alin mane ida ho identidade inisiál GSS, tara-an. Doutór rasik hatete katak, nia rasik mak tara-an duni,” Superintendente Xefe Polisia, Henrique da Costa, hateten iha kna’ar fatin, Komandu Jerál Caicoli, Sesta (21/01/2022).

Komando PNTL Díli liuhosi nia ekipa sira investigasaun nian, hamutuk ho servisu intelijénsia, tenta ho esforsu másimu hodi buka no identifika kauza hosi insidente ne’e, la hatudu sinál ruma. 

“Parte intelijénsia sira buka tuir informasaun iha ne’ebá, maibé laiha kauza ruma. Ita hatene de’it katak, vitima ne’e tara an,” Henrique da Costa, informa tán.

Ho rezultadu ezaminasaun ne’e, ekipa Komandu PNTL Munisipiu Díli, hamutuk ho médiku espesialista hosi HNGV ne’e, diretamente entrega ba familia hodi hala’o prosesu funerál.

“Entrega ba familia atu bele halo prosesu funerál. Ida ne’e ita la kontinua prosesu ba oin, no vítima ne’e  mane ida, maibé sira LGBT ne’e,” Komandante Henrique da Costa, hateten tán.

Jornalista: Rogério Pereira Cárceres